المهرجانات.. ومحمد رمضان.. وال Operational Definition..

أول سؤال سألهولى أستاذى الانجليزى المشرف على الدكتوراة، لما قولتله إنى عاوز أدرس أوجه الشبه بين عملية العلاج النفسي وعملية الإبداع كان: إيه التعريف اللى هانستخدمه للعلاج النفسي.. وإيه التعريف اللى هانستخدمه للإبداع؟ وسمى ده ال operational Definition..يعنى التعريف العملياتى اللى هانبدأ بيه الشغل..

 

طبعاً أنا كنت متصور ان دى حاجات معروفة وثابتة وان طلب الراجل عبارة عن طلب أكاديمى بحت.. لغاية ما قعدت أدور ولقيت خمسميت تعريف للعلاج النفسي وسبعميت تعريف للإبداع.. مش بس كده.. ده تعريف العلاج النفسي ومكوناته وأهدافه فى انجلترا وأوروبا والغرب كله يختلف كثيرا عن تعريف ومكونات وأهداف العلاج النفسي فى مصر والدول العربية والشرق كله..

 

قعدنا نتجادل ونتناقش لغاية ما حددنا واتفقنا مع بعض هانستخدم إى Oprational Definition فى شغلنا.

 

- احتفلنا بعيد الحب.. رغم عدم وجود Oprational Definition واحد لمعنى الحب فى هذا المجتمع أو فى هذه الثقافة.. ورغم إن أكتر كلمة تم اساءة استخدامها عبر التاريخ هى كلمة (حب).. ورغم إن معظم جرائم العلاقات بتتم وتبرر باسم الحب.. وان فيه على الأقل عشر أنواع من الأذى بيتعرض ليها المحبين تحت ادعاء الحب.. منهم حب التملك وحب الطاعة وحب الشروط وحب حالة الحب.

 

- أب قتل بنته لما عرف انها بتكلم شاب وقابلته فى عيد الحب.. بدل ما يقعد معاها ويسمعها ويعلمها.. قتلها باسم الشرف.. اللى برضه مالهوش أى Operational Definition متفق عليه فى مجتمعنا أو ثقافتنا.. فيه ناس تعرف الشرف على إنه الصدق والالتزام بالكلمة واحترام النفس والآخر..وفيه ناس تعرفه على إنه تلك المنطقة القابعة بين فخذى النساء.. تصور!

 

- تم منع (من يطلق عليهم مطربى المهرجانات) من الغناء.. من غير أي Opeartional Definition لإيه هى المحددات الموسيقية اللى تقول دى أغنية مهرجانات واللا مش أغنية مهرجانات.. ورغم إن النوع ده من الأغانى ليه جمهور يقدر بالملايين حتى لو لم نحبه أو نوافق عليه.. ورغم إن مافيش حفلة ولا فرح ولا خطوبة فى السنوات القليلة الماضية ماشتغلتش فيها أغنية من هذا اللون.. ورغم ان ستاد القاهرة بجلالة قدره استضاف نفس المطربين فى حفلة عيد الحب.. وقدمتهم -بكل أسف- الجميلة المثقفة جاسمين طه اللى كانت بتقدم حفلات الأوبرا منذ سنوات.. ورغم إن كل الموجودين على ساحة الغناء حاليا والجيل اللى سبقهم واللى قبله وجهت ليهم نفس الاتهامات.. مرة باسم أغانى الشباب.. ومرة باسم أغانى الخبط والرزع.. وغيرها كتير.. من أول عبدالحليم حافظ لغاية عمرو دياب وحميد الشاعرى اللى قالوا عليه وقت ظهوره انه هايبوظ الفن والذوق العام.. ودلوقت بيقولوا زمن الفن الجميل.. فيه تحفظات على كلمات بعض الأغانى؟ يبقى نحظر الكلمات القبيحة والألفاظ السافلة.. فيه ملاحظات على نوع وأدوات الموسيقى؟ نفهمها ونطورها ونشوف هانوصل بيها لغاية فين.. ونسيبها تنافس وتتنافس لغاية ما تاخد حجمها الحقيقي بين كل الموجود والمعروض.. لكن ازاى.. احنا اتعودنا ان اللى يزعجنا ننكر وجوده أصلاً.. واللى يوجع دماغنا نمنعه.. والباب اللى يجيلك منه الريح سده واستريح.. بكل رفض (مش استيعاب) وفوقية (مش تواضع) وعجرفة

 

دى كانت الجملة التانية المؤثرة فى عقلى لما بدأت دراسة التحليل النفسي للمجموعات: (ليس هناك أخطر من حشد غاضب).. افتكرتها لما لقيت دعوات مالهاش أول من آخر انهالت عليا من كل حدب وصوب للانضمام لجروبات مقاطعة محمد رمضان.. لأنه أفسد الجيل.. وبيقدم فن مبتذل.. وبيتفاخر بنفسه وجماهيريته.. وقطع عيش طيار سمحله بدخول كابينة طائرته وصوره على مقعد السائق.. ورغم إنى مش من محبي محمد رمضان ولا من مشجعيه.. إلا إنى كنت هاتجنن من كم الأسئلة اللى تواردت إلى ذهنى: ياااه.. هو انتوا افتكرتوا دلوقت إن محمد رمضان بيقدم فن مبتذل؟ طب إيه بقى الOpeational Definition بتاع مبتذل؟ العرى؟ ياسلام.. الملابس الغريبة؟ لا والله.. مشاهد البلطجة والألفاظ الخارجة؟ بجد؟ انتوا لسه فاكرين؟

- بعدها بيومين تم منعه هو الآخر من الغناء بنفس القرار السابق.. بعد ما كان فى يوم من الأيام بيستعان بيه فى حملات ضد المخدرات.

أنا فعلاً مش باحبه ومش باحب اللى بيقدمه.. بس اللى بيحصل معاه دلوقت غريب جداً بالنسبة لى.. ده Scapegoating بكل ما تحمله الكلمة من معان.. ده كل حد مش عاجبه حاجة فى نفسه أو فى غيره أو فى المجتمع أسقطها على محمد رمضان.. كل حد غاضب من أى حد أسقط غضبه على محمد رمضان.. كل حد مش عارف يقول لأ لأى حد قالها لمحمد رمضان.. ده فيه ناس كاتبة (نريد الطهارة لك يا مصر من كل النجاسات، فأنت الأم وأنت الحمى، ويسكن فى ثوبك كل القمامات.. ألقى ما عليك فى الجحيم، إن هم إلا فيروسات.. قاطعوا محمد رمضان).. وناس كاتبة (لسه هنراهن على وعى الشعب وهنوصل للمليون ان شاء الله..قاطعوا محمد رمضان).. ده الموضوع بقى مشروع مجتمعى!!!

طيب وباقى المسلسلات والأفلام اللى بتقدم اسفاف وابتذال؟ وباقى الممثلين والمغنيين اللى بيظهروا مع بنات شبه عارية فى أغانيهم؟ ايه كل هذا الانفصام والفصام والجنان الرسمى..

 

لأ طبعاً..

 

المشكلة ان احنا معندناش أى تعريف واضح وحقيقي لكتير من الحاجات فى حياتنا ولا فى مجتمعنا..

 

معندناش Operational Definition واحد للفن.. أو للعلم.. أو حتى للدين..

 

عندنا آراء.. وجهات نظر.. والشاطر اللى يفرض رأيه.. والفائز هو صاحب الصوت الأعلى..

 

بدل ما كل حاجة تبقى بالشبه..

احنا مش ناقصين لخبطة..