بحث آلاف رواد مواقع التواصل الاجتماعي، فيسبوك وتويتر، وموقع البحث العالمي جوجل، والوطن العربي، عن كواليس مسلسل الاختيار، وقصة الشهيد المنسي.
وقال صديق الشهيد المنسي، عبر حسابه على موقع "فيسبوك": "على ذكر الحالة اللي عاملها مسلسل الاختيار مع غالبية الشعب المصري واللي مأثر بشكل كبير في الناس ميجيش طبعًا حاجة في الواقع اللي حصل حقيقي في الأحداث".
وأضاف: "والحمدلله أنا كانت تربطني علاقة قوية بالبطل أحمد المنسي فهحكي موقف بسيط يبين جدعنته وطيبته وسعيه فإنه يفرح ويساعد أي حد ما بالكم لو علاقته بيه قوية أو بيعزه لما ربنا كرمنا و رزقنا بالعمرة وإحنا في العريش 2014 كانت عمرة مولد النبي".
وأشار: "و إحنا في الطيارة صورته الصورة دي وقعدنا طول الرحلة نحكي مكناش نعرف حد من الفوج اللي طالع المهم لقيته بيقولي نفسك في إيه لما نوصل مكة قولتله والله أنا آخر مرة جيت السعودية وأنا في 2 ابتدائي نفسي أكل الكبسة بالمكسرات أوي و اللحمة بتاعته".
وأكمل:"قال لي خلاص ننزل هنعمل عمرة مع بعض وتاني يوم هاكلك كبسة قولتله لا خلاص خليك براحتك إحنا نعمل العمرة مع بعض طبعا وأنا هبقي أروح لأختي جدة ساعة زمن أعيش هناك معاها وأكل براحتي قال لي لا هناكل مع بعض ولازم تأكل اللي نفسك فيه وصلنا مكة قرب المغرب عملنا العمرة تاني يوم فعلًا كلمني وعدي عليا في الأوضة في الفندق ونزلنا الحرم إتصورنا الصورة التانية وفعلًا كلم حد صاحبه عايش في مكة جالنا بعربية منتهي الاحترام و الجدعنة".
وأضاف:"المنسي قال له وديني أجمد مطعم كبسة ومندي هنا بالفعل خدنا صاحبه بعربيته رحنا مطعم و قعدنا أكلنا إحنا التلاتة كان مطعم جميل وأكل جميل جدًا وقعدنا نحكي يوم كامل وعرفني بيه قال له أخويا الصغير وعشرة طويلة بعدها قال لي خلاص كده تقدر تنطلق براحتك وكلمني لو عوزت أي حاجة أنا معاك و رحنا المدينة برضه قعدنا مع بعض شوية ورجعنا علي مصر وكانت رحلة جميلة و كرم من ربنا عليا بيها ربنا يكتبها لنا جميعا بحق الأيام المفترجة .- رحم الله الشهيد البطل و باقي إخواتنا الشهداء ."
