انتقد الدكتور طارق شوقي وزير التربية والتعليم والتعليم الفني، لجوء عدد من أولياء الأمور والطلاب لشراء الأبحاث والغش، في ظل الإجراءات الجديدة التي اتخذتها الوزارة لاستكمال العام الدراسي الحالي؛ لتفادي آثار انتشار فيروس كورونا.
وأضاف شوقي، خلال اجتماع لجنة الخطة والموازنة بالبرلمان اليوم: "هناك تسأولات كثيرة طرحتها الأزمة الحالية أبرزها هل نفتح التعليم الجديد للجميع دون ضوابط، خصوصًا إننا شوفنا مجموعة هائلة من أولياء الأمور والطلاب جايين ياخدوا شهادة بس مش بيتعلموا، وده بيهدر جزء كبير من ميزانية التعليم في البلاعة لإننا مش مستفيدين من اللي اتعلموا".
وتابع: "السؤال التاني التعليم المجاني لمين، للكل ولا لمن يستحق، اللي بيغش برده بياخد تعليم مجاني، فهل عايزين تصرفوا فلوسكم كده، ما نديلهم شهادة ونخلص، للأسف الستات كانوا واقفين طوابير زي طابور العيش علشان يشتروا الأبحاث، كلها أمور تحتاج لمواجهة خصوصا إن فيروس كورونا سلط عدسة عليها".
واستكمل حديثه قائلا: "اللي عايز يتعلم هنقدم ليه خدمة تعليم جيد، بس اللي مش عايز بلاش يشوشر عليها، لو مش عايز تتعلم أطلع بره متحشورش الفصل بـ70 طالب، لذلك فالموازنة الجاية هتكون موازنة التعليم تروح لمين"، مشيرا إلى أن بعض الطلاب يدفعون للمدرس لينجح الأولاد ويأخذ أعمال السنة، لذا فالسؤال الأهم "أين ذهبت أخلاقنا".
