السياح فرحانين ببلدنا.. والخير اللي في بلدكم ليكم ولأولادكم
أعلن الكاتب الصحفي هاني يونس المستشار الإعلامي لمجلس الوزراء، افتتاح تطوير وترميم هرم زوسر المدرج بسقارة.
وبثّ يونس عبر حسابه الشخصي على فيس بوك، فيديو مباشر من المنطقة، قائلًا: "شوفوا بلدكم حلوة إزاي وحلاوتها زايدة إزاي، جيت هنا من فترة والهرم ده حاله مكانش يسر، والحمد لله أعمال الترميم انتهت وجايين نفتتحه".
بلدكم بخير وياريت تحافظوا على الخير ده
وقال يونس: "عايزكم تشوفوا السياح وتتفرجوا، وأنا بفرجكم على السياح عشان تعرفوا إنّ بلدكم بخير وتحافظوا على الخير اللي في بلدكم، لأنه ليكم ولأولادكم، والشائعات اللي بنبثها ليل ونهار هي اللي خلت بعض الدول تقلق من المجيء لمصر، والشائعات اللي عمالين نشيرها عن عمد أو عن جهل هي اللي عاملة مشكلة ودول السياح اللي فرحانين ببلدنا واحنا فرحانين بيهم".
وأضاف: "هم دول السياح يعني فيه استثمارات وفي ناس بتضخ فلوس في البلد وناس بتصرف وفيه ناس بتاكل عيش وفي وظائف، وفيه ناس اشتغلوا وفيه مرشد سياحي اشتغل وكله بياكل عيش ودي مصر الحلوة اللي عايزين نحافظ عليها".
واستطرد: "مصر هي بلدنا وملناش غيرها، والناس اللي بره مصر لاقيين ملجأ ليهم وهما أصلا ما بيحبوش الأوطان، فخليهم بره ويحرقوا في نفسهم، إنما إحنا ملناش غير بلدنا فهنحافظ عليها ونحميها، وتحيا مصر تحيا مصر تحيا مصر".
ويقع الهرم في منطقة آثار سقارة، أو كما يطلق عليه العديد من الناس الهرم المدرج، وهو أحد المعالم الأثرية المهمة بجبانة سقارة غرب مدينة ممفيس القديمة في مصر، بناه أمنحوتب خلال القرن الـ27 قبل الميلاد، ليدفن داخله زوسر.
وشمل مشروع الترميم أعمال درء الخطور، والترميم الخارجي والداخلي للهرم شمل تطوير مسارات الزيارة المؤدية للهرم والممرات الداخلية المؤدية لبئر الدفن وأعمال ترميم التابوت الحجري، إضافة إلى أعمال الترميم الدقيق للحوائط.
ومشروع الترميم بدأ عام 2006، وتوقفت الأعمال عام 2011، واستؤنفت في نهاية عام 2013، ليتم الانتهاء منه مؤخرا، ليفتتحه رئيس الوزراء اليوم.
