حروب كبيرة قامت لاسباب تافهة جدا

 في سنة 1325 كان فيه مشاكل كبيرة وصراعات سياسية بين مدينتين في إيطاليا المدينتين هما بولونيا ومودينا 

وكانت المدينتين في صراع سياسي كبير لسنين طويلة لكن محصلتش أي حروب بينهم لغاية سنة 1325 لما سرق جنود من مدينة مودينا Modena جردل خشبي كان بيستخدمه سكان مدينة بولونيا الي كانوا بيستخدموه علشان يطلعوا بيه مياه من البئر 

ومع الرغم من ان الجردل ده مكنش مصنوع من خشب نادر او غالي لكنه كان السبب في اشتعال الصراع بين المدينتين اكتر  

وارسلت مدينة بولونيا جيش عدده تقريبا 32 الف جندي 

علشان يحارب جيش مدينة مودينا الي كان عدد حوالي 7 الاف جندي 

وعلشان دي حرب غريبة فنتيجتها كمان غريبة علشان قدر جيش مودينا انه يتصدى لجيش بولونيا الي كان عدده 32 الف جندي وخلاه ينسحب ويرجع تاني للمدينة بتاعته  

وفضل الجردل موجود في مدينة مودينا لحد دلوقتي في متحف المدينة 

وعدد الضحاية في الحرب دي كان 2000 شخص 

1500 من بولونيا و 500 من مودينا 

2000 شخص ماتوا علشان جردل 

 

الحرب دي حصلت في سنة 1859 في جزيرة اسمها سان خوان وموجودة في الجزء الشمالي الغربي من الولايات المتحدة 

جزيرة سان خوان كان بيعيش فيها مجموعة من المواطنين الامريكان ومعاهم مجموعة من المواطينين البريطانيين 

وكل طرف من الطرفين دول كان بيقول ان جزيرة سان خوان تابعة ليه 

وابتدت الحرب بينهم لما فلاح امريكي اسمه ليمان كاتلار Lyman Cutlar ضرب خنزير بالرصاص وموته علشان الخنزير كان بيبوظ محصول البطاطس الي كان بيزرعه الفلاح الأمريكي 

والمشكلة ان الخنزير الي اتقتل ده كان بيمتلكه واحد من البريطانيين  

وقامت مشكلة كبيرة بين الفلاح الأمريكي ليمان كاتلار Lyman Cutlar والشخص البريطاني صاحب الخنزير 

وفضلت المشكلة تكبر لغاية ما بقت فيه صراعات بين كل البريطانيين والامريكان الي في الجزيرة 

ولما المشكلة كبرت عرض ليمان كاتلار Lyman Cutlar انه يدفع للبريطانيين 5 دولار كتعويض مقابل الخنزير الي قتله 

لكن البريطانيين رفضوا وكانوا عاوزين تعويض 100 دولار مقابل الخنزير 

وفضلت المشكلة تكبر اكتر 

وراح الامريكان بلغوا الجيش علشان يجوا يحموهم من البريطانيين 

راح الجيش الأمريكي بعت مجموعة من الجنود عددهم 461 جندي و 14 مدفع بقيادة الكولونيل سيلاس كيسي Silas Casey ولما وصل الجنود الامريكان الجزيرة اعلنوها ارض أمريكية 

وده سبب غضب كبير للجيش البريطاني لانه كان عاوز هو الي يسيطر على الجزيرة 

قام الجيش البريطاني بعت مجوعة من الجنود عددهم 2140 جندي و 70 مدفع و 5 سفن حربية 

بقيادة الادميرال روبرت بينز Robert Baynes

وفضل الوضع متوتر بينهم لحوالي أسبوعين وكانت كدة أمريكا على وشك انها تبتدي حرب مع بريطاني 

لكن في النهاية محصلش تبادل اطلاق نار بينهم وتوصلوا لاتفاق بالاحتلال المشترك لجزيرة سان خوان 

وكدة انتهت المشكلة الي كانت هتكون السبب في بداية حرب كبيرة بين بريطانيا وامريكا 

وكان السبب لكل ده هو خنزير 

 

في سنة 1739 كانت العلاقات بين بريطانيا واسبانيا سيئة جدا 

بسبب التنافس في استعمار دول اكتر 

والتنافس في التجارة الخارجية بين الدولتين 

وفي سنة 1739 جه شخص اسمه روبرت جينكنز، وهو قبطان سفينة تجارية بريطانية 

وكان بيحاول يهرب بضاعة لامريكا الشمالية 

وبحسب معاهدة إشبيلية سنة 1729 الي سمحت للإسبانيين بتفتيش السفن البريطانية التجارية المتجهة إلى الأمريكيتين

واكتشف الضباط الاسبان البضاعة الي كان جينكنز بيهربها فكعقاب ليه قام ضابط اسباني وقطع ودن روبرت جينكنز 

فلما رجع روبرت جينكنز لبريطانيا راح وعرض ودنه المقطوعة قدام أعضاء البرلمان البريطاني وعرفهم ان الي قطعوا ودنه هما ضباط اسبانيين 

وغضب أعضاء البرلمان البريطاني واعلنوا الحرب على اسبانيا 

واستمرت الحرب دي لمدة 9 سنين واتقتل فيها حوالي 500 الف جندي 

 

 

الحروب هي من ابشع الحجات الي حصلت في التاريخ وزي ما شوفنا ممكن حروب تحصل لاسباب تافهة جدا 

هي ممكن تكون الأسباب دي مش هي السبب الحقيقي للحرب وان بيكون فيه صراع قديم 

ويجي سبب صغير يكون هو الشرارة الي اشعلت فتيل الحرب