أحمد علام
- يابيه عندنا خمس عيال ومش عارفين نربيهم
- طيب خلفتوهم ليه ياإيهاب ؟
- علشان العيل بييجى برزقه
- طيب كان اتنين كويسين ومتخلفوش تانى
- كلامك ده كفر بحكمة ربنا يابيه بجد
- ليه بس ياايهاب
- الشيخ بيقول الرسول قال تناسلوا فانى مباهى بكم الامم يوم القيامة
- هو يقصد التزاوج واعمار الكون باللى ينفع الانسان نفسه مش نبقى ارانب نتكاثر بس ويقصد فى حالة انك تكون قادر تربيهم وتعلمهم كويس وانك لاقى تاكل مش سريح باليومية ياايهاب
- لا الشيخ قال كثرتكم علشان نبقى اكتر من اليهود ويستخبو ورا الشجر ونقاتلهم
- طيب ما احنا اكتر من اليهود ياايهاب فهيستخبو ليه ورا الشجر دا احنا مليار ونص وهم ٢٠ مليون
- ياباشا دول عزوتى وعزوة البلد
- طيب ياإيهاب يعنى انت بتخلف علشان ايه وايه هدفك يعنى عاطفة الابوة وتربي طفلك وتعلمه صح ولا مخلفه يحارب اليهود .. ولا هو انجازك انك تخلفهم مش تربيهم وتعلمهم وتقدم أفراد صالحين فى المجتمع ولا تخلفهم بعدين ترميهم ويطلعو ساخطين وحاقدين ومتسلفين ومتحرشين وشحاتين ..إيه إنجازك فى خلفتهم
- يابيه الانجاز دلوقتى انى الاقى خمسين جنيه اجيبلهم عيش وحلاوة يطفحوا وبعدين هفكر ياكلوا ايه الصبح
حدث بالفعل فى بلدنا التى يبلغ إحتياطيها النقدى اقل من40 مليار دولار بينما السعودية صاحبة 700 مليار دولار إحتياطى نقدى زائد صناديق المستقبل والإستثمار الخارجى وبهم 400 مليار دولار وصاحبةال20مليون نسمة بدأت تناشد المواطنين بحملات عن ضرورة المسؤلية عند الإنجاب ومراعاة كل فرد لظروفه وظروف موارد المملكة فى حين أن جهاز الإحصاء والتعبئة المصرى يقول أن اكبر منطقة ذات كثافة إنجابية فى مصر هى سوهاج أفقر محافظاتها !!
فهل لدى مشايخ المنابر وقت ليوجهوا هؤلاء الذين يمثل لهم شيخ المنبر رأى الدين أم أن كل الوقت للحديث عن فتاوى المرأة وحكم الخروج بدون إذن الزوج وحكم النقاب وحكم إرتداء الصنادل دون جوارب وحكم الوضوء بالمانيكير !!
