أعداد وتقديم :بيتر عاطف
والمشهور بتمثال " محمد لاظوغلي باشا " الي كان رئيس وزراء مصر في سنة 1808 في عهد  " محمد علي باشا " 
لكن المعلومة الي مش كتير الي يعرفوها هي ان التمثال الي في ميدان لاظوغلي في الحقيقة التمثال ده مش لمحمد لاظوغلي باشا الحقيقي لكن التمثال ده لواحد فقير وغلبان لكنه كان محظوظ علشان يتعمل له تمثال كبير بدل لاظوغلي باشا ويوضع تمثاله في واحد من اشهر ميادين القاهرة 
هنوضح في الحلقة دي من هو لاظوغلي باشا وقصة التمثال الموجود في الميدان الي على اسمه 
" محمد لاظوغلي باشا " اتولد في تركيا في " منطقة البحر الأسود "
واسمه الحقيقي محمد لاظ ، وكلمة " اغلي " معناها بالغة التركية " ابن " فبكدة لاظوغلي معناها ابن لاظ 
لاظوغلي كان صديق لمحمد علي لما كانوا لسة جنود في الجيش العثماني 
ومع قدوم الحملة الفرنسية على مصر سنة 1798
جه محمد علي ومعاه محمد لاظوغلي على مصر مع الجيش العثماني الي ارسلته الدولة العثمانية لمصر علشان يحارب الحملة الفرنسية 
وبعد رحيل الحملة الفرنسية من مصر استقر محمد على ومحمد لاظوغلي في مصر بعدها وفي سنة 1805 اصبح محمد علي هو حاكم مصر 
وعين محمد علي صديقة محمد لاظوغلي وزير للمالية وكان ليه إصلاحات اقتصادية مهمة في مصر 
وفي سنة " 1807 " لما أرسلت بريطانيا حملة عسكرية بيقادة " الجنرال فريزر " علشان يحتل مصر 
اتعين محمد لاظوغلي وزير الحربية لمصر وبكدة اصبح هو اول وزير حربية في تاريخ مصر الحديث 
وكان للاظوغلي دور كبير في التصدي للجيش البريطاني ومنعهم من احتلال مصر 
وبسبب إنجازاته في مصر عينه محمد علي رئيس للوزراء في سنة 1808 
وفضل في المنصب ده لاكثر من 15 سنة 
وكان اهم واحد في مساعدين محمد علي 
وكان محمد علي بيعتمد عليه في كل حاجة 
وفيه اراء بتقول ان محمد لاظوغلي كان هو صاحب فكرة مذبحة القلعة الي تخلص فيها محمد علي من المماليك 
لكن الآراء دي مش اكيدة 
لكن الأكيد ان محمد لاظوغلي كان من القليلين الي كانوا عارفين بخطة مذبحة القلعة 
الي محمد علي كان مخليها سرية تماماً 
لدرجة ان أبناء محمد علي مكنوش عارفين بالخطة دي 
وفضل محمد لاظوغلي هو اقرب شخص لمحمد علي لغاية لما اتوفى لاظوغلي سنة 1827 
وبعد مرور حوالي 40 سنة من وفاة محمد لاظوغلي وفي سنة " 1869" وفي عهد الخديوي إسماعيل 
قرر الخديوي انه يبني 4 ميادين كبيرة زي الميادين الي في أوروبا 
وطبعاً لازم الميادين دي يكون فيها تماثيل لشخصيات مهمة 
فقرر الخديوي انهم ينحتوا " 4 تماثيل " لشخصيات مهمة في عهد محمد علي 
التماثيل الاربعة كانت لمحمد علي ، إبراهيم باشا أبو الخديو إسماعيل ، سليمان باشا الفرنساوي ،
ومحمد لاظوغلي باشا 
وكلفوا النحات الفرنسي " جاك مار " انه ينحت تمثال لمحمد لاظوغلي 
لكن فيه مشكلة كبيرة واجهت النحات انه ميعرفش شكل لاظوغلي 
ومقدرش يلاقي أي صورة او رسمة ليه 
ده لان لاظوغلي مكنش بيحب الشهرة والظهور وكان رافض تماماً فكرة انه يترسم او يتصور وقليلين الي كانوا عارفين شكله الحقيقي ومكنش ليه أبناء 
فعلشان يقدر النحات انه يعمل تمثال للاظوغلي كان لازم يكون عارف شكله وملامحه كويس 
 فكانوا هيلغوا فكرة تمثال لاظوغلي 
لكن الخديوي إسماعيل رفض واصر انه لازم يتعمل تمثال لمحمد لاظوغلي باشا وامر الحكومة بكدة 
وكلفت الحكومة " أحمد باشا الدرملي " محافظ القاهرة وقتها انه لازم يلاقي صورة او رسمة لمحمد لاظوغلي 
لكن الدرملي باشا مقدرش انه يلاقي أي صورة عند أي حد من أصحاب او أقارب لاظوغلي باشا 
وفي يوم ماشي الدرملي باشا مع " محمد ثابت باشا " وزير المعارف والأوقاف وقتها فى حى خان الخليلى
وفجأة شافوا راجل فقير شايل على ظهرة قربة مياه وواضح انه شغال " سقا " 
فمحمد ثابت باشا قال للدرملي باشا الراجل السقا ده نفس شكل لاظوغلي باشا بالظبط 
وقالوا للسقا انهم عاوزينه في مهمة كبيرة وانه هياخد مكافئة كبيرة منهم 
وكلف الدرملي باشا المساعدين بتوعه انهم يفصله للسقا بدله فاخرة زي الي كان بيلبسهم لاظوغلي باشا 
وطلبوا من السقا انه يقف بعظمة وشموخ زي ما يكون ملك 
وصوروا السقا مجموعة من الصور  وبعتوهم للنحات الفرنسي جاك مار الي فضل ينحت في التمثال 3 سنين 
وفي سنة 1872 بعد انتهاء نحت التمثال وضعوه في موقعه الحالي في ميدان لاظوغلي 
لكن ملامح التمثال هي للسقا الفقير مش للاظوغلي باشا 
بقالنا حوالي 150 سنة بنشوف تمثال لراجل سقا بسيط وفاكرينه رئيس وزراء مصر 
 
مراجع المعلومات 
حكاية تمثال لاظوغلي.. وضعوا السقا بدلًا من الباشا
 كتاب كل رجال الباشا محمد على وجيشه وبناء مصر الحديثة
 محمد لاظوغلي باشا - ويكيبيديا