مرقس كمال
عاوز اقولك إنك أهم مخلوق ربنا خلقه
وعاوز اقولك إن حياتك دى منحة منه هو وهبهالك من فيض حبه مش لأنك كويس وتستحقها
عاوز اقولك كمان ان فى اللحظة اللى انت عايشها دلوقتى
موجود معاك 7 مليار شخص عايشين على كوكب الارض
ربنا مديلهم الحرية الكاملة فى اخياراتهم
حرية حتى فى إنهم يختلفوا عليه هو نفسه
حرية ان كل واحد يشوفه ويؤمن بيه بطريقة
حرية حتى فى انهم ينكروا وجوده
وهو شايف وعارف وسامح بكده وبيتعامل مع كل واحد بطريقته
وعلى فكرة هو ممكن يفنى اي حد فى لحظة لو حابب بس دى مش طريقته لانه يهمه الإنسان وبيديله بدل الفرصة آلاف وكلنا مجربين ده
أيوه هو سايب الكل إنما هييجى وقت كلنا هنقف قدامه وهو قاضي عادل عارف قلوب وخفايا الكل وهيجازى كل واحد حسب عمله وهيستعمل كتير من الرحمة .. وهو حر
لكن الحرية دى زعلت ناس كتير ومعجبهاش اللى ربنا سامح بيه ده فقالوله ازاى يارب تعمل كده
وقعدوا مكانه يحكموا على الناس ويقاضوهم على حرية اعتقادهم اللي ربنا منحهالهم
ووصل الأمر للتطاول والشتيمة والتكفير وممكن ساعات للقتل وكل الحاجات اللى لو دلت على شى تبقى بتدل على أنهم ولا يعرفوه ولا فاهمين مقاصده ولا فاهمين الحرية اللي اداهالهم ولا معرفتهم بيه اللى بيزعموها غيرتهم للافضل
من فضلك لو انت واحد من دول راجع نفسك واعبد ربنا بطريقتك وسيب غيرك يعبده بطريقته
عرف اللي قدامك إيمانك مش بالكلام والمبارزات انما باخلاقك ومحبتك وسلامك وخيرك وخدمتك للى قدامك عشان انسان
مش بعنفك وشتيمتك واهانتك
قدم ايمان عملي لان لغتك تظهرك واعمالك هي اللي هتحكى عن إيمانك
عزيزي الإنسان خليك انسان
خليك مكانك ومتاخدش مكان ربنا
