كتب: محمد أبو قمر
1- محاولة تشويه السيسي وتخوينه والإصرار علي إن كل إللي الدولة بتعمله فنكوش واتهام السيسي بإنه عميل وضعته اسرائيل علشان يضيع فلوس الشعب في عمل طرق وكباري ومدن جديدة وجامعات وينمي الريف المصري ويعمل مصانع ويقوي الجيش ويعمل دولة جديدة بعد أن كان الوطن علي وشك التفكك .
2- محاولة حث الشعب وتحريضه علي الخروج إلي الشوارع لإزاحة السيسي وإعادة مرسي ، أي مرسي والسلام علشان ينقذ الوطن ونبيع الأسلحة إللي اشتراها السيسي ونهد المدن الجديدة ونخرب الطرق إللي ملهاش لازمة دي ، وندمر الكباري ونوقف مشروع تنمية الريف علشان نرجع ريحة الجلة وطفح المجاري إللي السيسي عايز يحرمنا منها ، ونمنع إدخال الغاز للقري لأن السيسي عايز يحرمنا من الكانون إللي كان بيسوي حلة المحشي بطريقة تخلي صباع المحشي أحلي وأطعم من صباع الكفته.
سيبك من الإخوان ، ما خلاص القطر فات وإعدامهم هايبقي يوم التلات ، ركز معايا في الأفندية إللي بيتكلموا كلام حداثي يتهيألك إنه نابع من موقف وطني وهو في الحقيقة صدي لكلام الإخوان ، انا سمعت واحد منهم بيقول إن الشعب المصري مغيب وبيعبد السيسي ، وواحد تاني بيقول إن تنمية الريف المصري هاتقضي عليه عوامل التعرية ، وواحد تالت بيقولك السيسي هو إللي أوعز للإثيبويين بإنهم يبنوا السد وتآمر معاهم ومع اسرائيل لتعطيش الشعب وتخريب الأراضي الزراعية.
الأفندية دول كتير منهم قابل الإخوان في السنة السودا ، وكانوا متعشمين فيهم أوي إنهم هايفرقوا عليهم شوية وظائف ومراكز حلوة في منظومة السلطة لكن الإخوان لسعوهم علي قفاهم طاخ طريخ طاخ ، فراحوا طالعين في وسط الشعب في 30/6 علي أمل معالجة لسعة الإخوان علي قفاهم ، لكن الشعب شاف آثار اللسعة مورمة قفاهم ، والشعب المصري بطبعه ما بيحبش النوعية دي من الناس إللي عندها استعداد تخسر شرفها علشان مركز أو وظيفة ، وما بيحبش الناس إللي قفاها مختوم خصوصا بختم الإخوان .
ركز معايا في النوعية دي ، اساتذة...ومثقفين...وإعلاميين....وأدباء...وسياسيين...وقال إيه نشطاء وحقوقيين ، هما مجموعة يدوب يعملوا سبحة من إللي بتشوفها في إيد أي نصاب إسلامجي ، واخدين ألقاب الأستذة والثقفنة واللبرله واليسارية والنخبوية تقريبا من أحد الحمامات التركية إللي لسه باقي منها كام حمام في كام مدينة .
هاتلاحظ إن الأفندية دي بتتكلم حلو ، حلو أوي لدرجة إنهم يصعبوا عليك وتبقي عايز تصدقهم بس ساعة ما تتأمل فيهم كويس تلاقي لسعة الاخوان باينه خالص علي قفاهم ، ساعتها تموت علي نفسك من الضحك.
عيد سعيد علي الشعب المصري بمسلميه ومسيحييه بسلطاته ببابا غنوجه ، كل سنة ومصر قوية وعفية بشعبها الجميل.
