محمد ابو قمر
هاتقوليلي إن إللي كان في تونس ده ديمقراطية ، يا جاكي ياحبيبتي هي الديمقراطية إللي تجيب سفاح قاتل ومتخلف يتحكم في مصير شعب تبقي ديمقراطية؟؟!! ، وحياة المعزة إللي بينا ياجاكي إللي حاصل في العراق وليبيا وتونس وإللي بيحاولوا يعملوه في سوريا ولا كانوا بيحذأوا علشان يعملوه في مصر دا لعبة مغرية وشكلها حلو زي ألعاب الكمبيوتر اتقلوظت وفرح بها الليبرلجية لأنها زي لعبة الكراسي الموسيقية إللي يلحق يقعد يبقي هو البريمو بغض النظر عن هو مين وإيه هي قيمته أو خبرته أو قدرته علي قيادة وطن.
يعني إنتي عاجبك ديمقراطية العراق ؟، في العراق إللي بيحط إيده علي قرشين بقوا بتوعه ، النهب الديمقراطي شغال علي ميه بيضا ياجاكي ، مفيش في ديمقراطية العراق حد ممكن تقولي عليه مسئول عن حاجه ، كل واحد ماسك حته ، مهي ديمقراطية بقي حسب الأصول كل من هب ودب لازم يبقي له حق يمسك أي حاجه ، والأحزاب الديمقراطية بقت ميلشيات ديمقراطية برضه ، والدنيا هيصة وزنبليطة وكل فصيل له قرايب بره والقرايب دول قرايب بقي لهم الحق في إنهم يمارسوا حقوق القرابة في البلد.
طيب عاجبك ديمقراطية ليبيا؟ ، تقدري تعديلي كم شخشيخة هناك ، دا حتي رئيس المجلس الرئاسي هناك لما جه يتكلم عن إللي حصل في تونس انتظر لما أردوغان يقول رأيه ، وزي البغبغان قال بالحرف الواحد إللي قاله أردوغان ، قال إن إللي حصل في تونس انقلاب ، كلام ديمقراطي زي ما بيقول الكتاب.
طيب إيه رأيك في ديمقراطية تونس؟ ، حلوه ، زي الفل ، حققت المشاركة السياسية لجميع الفصائل السياسية في حكم البلاد ، كويس خالص ، شيء يبسط الليبرلجية عندنا ، الرئيس له حته ، ورئيس مجلس النواب له حته ، ورئيس الوزراء له حته ، والبلد كلها كانت في حته لوحدها ، التونسيين بيشتغلوا بس مكنش معروف هما بيشتغلوا لصالح مين ، نتاج شغلهم رايح ومش عارفين رايح فين وبيشتغلوا ليه وعلشان إيه تبقي النتيجة انهيار اقتصادي وبلوه صحية بتاكل في أرواح الناس ، وفي وسط الكارثة دي رئيس البرلمان ياجاكي بيطالب رئيس الوزراء بتعويض الإخوان بمبلغ تلات آلاف دولار عما حدث لهم من تضييق في عهد بن علي ، يعني الإخوان مكنش مكفيهم اليغمة إللي بيستولوا عليها ، والحتة إللي ماسكينها في البلد كانت ضيقة أوي عليهم فكانوا بيحاولوا يجوروا علي بقية الحتت.
ديمقراطية تونس جابت سفاح رئيسا للبرلمان ياجاكي ، وجابت قتلة متهمين في قضايا إرهابية ومالية كأعضاء في البرلمان ، مهي الديمقراطية حلوه ، الفرص فيها مفشوخة ع البحري.
دا مش معناه إن أنا رافض الديمقراطية ، لو ظنيتي كده ياجاكي هازعل منك وهاخاصمك ، بس الشوربة إللي الغرب طبخهالنا وقلوظهالنا وإللي كتير من أفنديتنا معجبين بها أوي دي شوربة عدس ، الديمقراطية ياجاكي الصندوق الانتحابي هو آخر مرحلة فيها لأن مراحلها كتيرة جدا وتقيلة جدا وعظيمة جدا ، تعليم مثالي وأمية بكل أنواعها مفيش ، فصل الدين عن السياسة علشان محدش يلعب بديله ويخم الناس ، حركة تنوير حرة وقوية وجادة ، رؤيا ثقافية تصحي الناس وتملاهم بالوعي ، إبعاد رجال الدين مش الدين عن الحياة الاجتماعية والسياسية ورفع وصايتهم ، إعلام واعي مثقف له رؤيا تتناغم مع آمال الناس وتطلعاتها مش إعلام جاهل ومتواطيء ومخترق وساذج ، تطور صناعي متسارع يكون في مقدوره رفع مستوي معيشة الناس ودا لأن الأخلاق كمان مرتبطة ارتباط وثيق بالمستوي الاقتصادي اللي يطمن الناس ويهدي سرها .
مش إحنا جربنا الصندوق في السنة السودا؟! ، أهو إنتي شوفتي ياجاكي الصندوق جابلك إيه أيامها ، جابلك واحد أهطل كان بيمشي في قصر الرئاسة بالفانلة واللباس أبو دكة ، وشوفتي كان بياكل إزاي في القصر وبياكل إيه ومع مين ، فاكره لما كان بيمص قصب هو وولاده وجماعته في قصر الرئاسة بعد الغدا؟!
شوفتي ياجاكي مين كانوا أعضاء البرلمان في السنة السودا ، فاكرة البلكيمي إللي كان واخد الولية علي حجره في العربية وبيعمل معاها قلة أدب رغم إنه مؤمن وبتاع ربنا؟؟.
إدعي معايا ياجاكي ربنا ينصر شعب تونس .
