كشفت النجمة منى زكى، كواليس بداية علاقتها بزوجها نجم الكوميديا أحمد حلمى، مؤكدة أنه فى بداية رؤيتها له قالت إنه "رخم"، ولكن سرعان ما أحبته.
وروت منى زكى فى حوارها لـ برنامج "صاحبة السعادة"، والذى تقدمه الإعلامية إسعاد يونس، على قناة dmc الفضائية قصة حب وزواجها من أحمد حلمى، قائلة : "كنت فى مرة فى مكتب المنتج محمد فوزى، وكنا هنعمل مسرحية بطولة عامر منيب، وقاللى إن فى دور عنده بيفكر يجيب فيه أحمد حلمى وكان وقتها بيعمل برنامج لعب عيال، وأنا كنت بتابع البرنامج ده بس مكنتش عارفة وشه لأنه بيظهر بضهره".
وتابعت منى زكى : "قلت للمنتج محمد فوزى يا ريت ده حد لذيذ أوى، وأنا بينى وبين نفسى عاوزة أشوف وشه، ولما جه المكتب سلم بطريقة غريبة كده، وبعدين جاله تليفون وأنا ومحمد فوزى دخلنا البلكونة بنتكلم وقلتله لا ده طلع رخم أوى ومش لذيذ زى البرنامج، وقلتله جربه أنا مش عارفة، ووقتها كنت بقول عليه انه رخم أوى على الحقيقة".
وأضافت: "بدأنا بروفات وبدأت أشوفه لذيذ، وهو تقريبا حس إنى هامشى من المسرحية وكنت فعلا وقتها هاعتذر، وقال ناخد أرقام بعض، وبقينا بنتكلم فى التليفون وبقينا أصحاب جدا، وعرَّفته كمان على أصحابى المقربين، وهو حاول كتير يلفت نظرى فى أكتر من موقف ولكن أنا ولا أى حاجة بتتهز جوايا، يمكن لأن حب والدى الرهيب واهتمامه بيا والعطاء اللى عمله ليا خلانى مش أى حركة شاب يعملها أنه يأثر فيا لأنى واخدة حب كبير أوى من والدى".
وأضافت منى زكى: "فى مرة سألنى عيد ميلادى امتى وسألته ليه، فقالى عادى فقلتله، فقالى ايه ده وأنا كمان نفس يوم 18 نوفمبر، وأنا بينى وبين نفسى إيه الجوا القديم ده ومكنتش مصدقاه، بس طلع صادق فعلا وطلع نفس يوم ميلادى، وقالى بحبك وسيبته وروحت مع أصحابى، ولما سافرت فضل الموضوع فى بالى".
وتابعت منى زكى: "بدأت أراجع صفات كتير فى أحمد حلمى ولقيت عنده نبل وعمرى ما شفت فنان بالشكل ده عنده رقى وطيبة فى التعامل مش عادى، وعنده تسامح يفوق أى حد قابلته، فشفت إنه شخص من جوا حاجة جميلة جدا ومثقف جدا ومتفتح، ولقيت نفسى بعد كده مش هقدر أعيش من غيره، وكل لما نتكلم أكتر يبدأ حاجات تنمو جوايا تجاهه".
