مؤمن سلام
في يوم 8 نوفمبر روحت اسحب معاش والدتي لاقيت الماكنة بتقولي "هذه البطاقة مُبلغ عن سرقتها وتم ايقافها"، حاجة كده تخُض في اول لحظة وتديك انطباع ان في حاجه غلط فتحاول تاني فتطلع نفس الرسالة، وده يدينا فكرة عن عقلية بتوع الآى تي اللي شغالين في البنك، اللي هو ما تكتب رسالة تقول تم تجميد الحساب برجاء زيارة البنك، بس احنا لسه حنعمل رسالة مخصوص اعمل كوبي وبيست لأى رسالة وكبر دماغك.
دخلت البنك اخد رقم خدمة عملاء، فبتاع الأمن قالي ان ممكن اكلم خدمة العملاء واداني رقم التليفون، واخدت رقم الدور برضوا، اتصلت بالرقم فضل حاططني 6 دقائق على موسيقى واعلانات لحد ما زهقت وقفلت، وكل ده بفلوس طبعاً، بعد ساعة من الرمية عالرصيف طلع واحد طويل واصلع ونادى على رقمي اخدني ودخلنا البنك ومن غير مكتب ولا معرفة اسمه ولا وظيفته وقفنا نتكلم في وسط البنك، حاجه منتهى المهنية الحقيقة وبتقول أد ايه احنا محترفين في عملنا!!! وطلب مني شهادة بتقول ان عندها الزهايمر عشان اقدر انا بالتوكيل اللي معايا اجدد البيانات.
امبارح رحت عملت مغامرة الشهادة اللي حكتلكم عليها في مستشفى النزهة وكمال الفوال.
رُحت النهاردة الصبح بدري على البنك ودخلت على موظف خدمة العملا اللي برضوا مش محطوط اسمه على المكتب، فانت مش عارف انت بتتعامل مع مين ولو عندك شكاوى منه مش حتعرف تشتكي مين، واضح ان عشان كده بنقول في مصر الشكوى لغير الله مذلة، حكتله القصة واديته البطايق والروشته ورقم الحساب، رح مكلم حد في التليفون، وطلع فوق ومعه الأوراق، شوية ولاقيت الأخ اللي كلمني على الواقف المره اللي فاتت نازل ومعاه الروشته، وقعد على المكتب وأعد يحكيلي قصة ولفه طويلة عشان في الأخر يقولي روح اعمل قوامة على الوالدة، يعني اروح المحكمة واقدم على طلب قوامه، واى محامي يعملها والهجص ده، طب انت ماقولتش ده من المره اللي فاتت ليه؟ ليه طلبت شهادة دكتور بحالتها الصحية؟ طالما ان في كل الأحوال مش حتحل الموضوع وحتقولي روح المحكمة، وبرضوا روح اتأكد من التأمينات ان ده ينفع أصلاً، طبعاً لما روحت التأمينات كانوا قافلين واخدين اجازة مع المدارس.
أثناء الحوار سألت الموظف المجهول طيب كده المعاش حيتوقف؟ قالي لا هو حيفضل يتحول على البنك بس مش حتقدروا تصرفوه، فقلت له اه بس لو ماتت حنقدر نورثه، رح مطلع حته الهمبكة المصري وقعد يقول بعد الشر، مانخدش من البلد دي غير الهمبكة، بدل ما تتهمبكوا حلولنا مشاكلنا مش تعقدوها.
المهم وانا بتكلم مع الموظف 007، جاه واحد تاني مش عارفه موظف ولا ايه بالظبت، وقعد قصادي ولاقيت البطايق في ايده، حد لبسه وشكله مايديش على موظف بنك ابداً خاصة داقنه السلفية الشعثاء والقميص اللي لابسه، فمش عارف هو موظف بس سلفي فمعفن في لبسه أو موظف مُستجد لسه متعلمش الشياكه، المهم لاقيته دخل في الكلام وبيقولي على فكرة بطاقة الوالدة منتهيه، قولت له عارف، ايه عايزني اروح اجددها كمان؟
المهم لميت الورق وحطيته في المحفظة ومشيت وانا بسأل نفسي يا ترى حتقع امتى؟
