كتب - محرر الاقباط متحدون
تساءل المفكر والطبيب خالد منتصر ، قائلا :" هل الجدات ملزمات بالعمل مربيات للأحفاد؟، هل الجد والجدة مالهمش حق يرتاحوا، الخلفة مسؤولية ماتخلفش وبعدين تحتاس وتدور على شماعة.
وكتب منتصر عبر حسابه على فيسبوك :
أرى وأسمع يومياً بنات موظفات أو عاملات في خناقات مع أمهاتهم عشان الجدة مش عايزه تقعد الحفيد عندها لغاية ماترجع البنت من الشغل،البنت تعتبر ان ده واجب على أمها انها تعتني بالحفيد، وترفض أن يكون حسب الظروف، لازم يومياً، وممكن تقاطع أمها وتتهمها بالجحود .
الجدة تتحبس ..تتوتر ..تتضايق ..مش مشكلة ، السؤال هل الجد والجدة مالهمش حق بعد المشوار الطويل المجهد ده في الحياة انهم يستريحوا ويتفسحوا ويتركوا المسؤوليات ويتخلوا عن توتراتها شوية؟؟مراقبة الحفيد أو الحفيدة وتحمل مسؤولية انه وقع ولا اتعور و لا جتله عدوى ولا اتشاقى ..الخ ممكن تكون حاجة ماعادتش تتناسب مع سنهم ولا ظروفهم ولا أعصابهم ، ليه البنت تعتبرها فرض عين وواجب على الجدود ولو ماعملوهاش يبقوا مابيحبوش بنتهم وعايزين يخربوا عليها ويدمروا بيتها .
كل بنت موظفة وزوج موظف أو عندهم بيزنس ..الخ ممكن يأجلوا الخلفه لغاية ماتتحسن ظروفهم ، ولازم الدولة توفر حضانات مناسبة بمربيات متدربات وبمستوى عالي ومتعلمين علم نفس كويس ، لازم ثقافة التعامل مع المربيات والخادمات تتغير ،والمجتمع يتعامل معاها على انها مهنة محترمة زي أي مهنة ،ومافيش واحده تخجل منها كأنها عامله جريمة!!!.
لكن مايبقاش الحل ان الجدات يتحولن الى ماكينات خدمة بالأمر المباشر !!.
لازم كل بنت وست تعرف ان أمها في السن الكبير عايزه تستريح ، بتحب حفيدها طبعاً لكنها مش ملزمة أو مجبرة انه يبقى طقس يومي !!.
قبل ماتخلفوا اسألوا نفسكم أحوالنا الاقتصادية تستحمل مرتب مربية؟ هل ممكن نحط فلوس على جنب للحضانة؟؟ وخرجوا أبوكم وأمكم من الحسبة، ولو معاكوش ماتخلفوش دلوقتي .
ملحوظة: القضية مش شخصية ، لأن أولادي مش متجوزين،والحمد لله أنا وزوجتي برغم اننا بنشتغل ما رميناش مسؤوليات أولادنا على جد أو جدة ، وكمان كنا عايشين في مدينة بعيدة عنهم، يعني حتى مافيش فرصة من أصله لالقاء المسؤولية عليهم .
