كتب: محرر الأقباط متحدون
أكدت المحامية نهاد أبو القمصان عضو المجلس القومى لحقوق الإنسان، على استعدادها للتطوع للدفاع عن ممرضات مستشفى قويسنا المركزى الذى تم التعدى عليهم من قبل طيار، وتمت إحالته للمحكمة العسكرية.
وقالت " إحالة الطيار المعتدى للمحكمة العسكرية واتطوع للدفاع عن الممرضات لو حبو يشرفونى
فى واحد مجرم دخل مستشفى بحالة محتاج كشف واعتدى على الممرضات هو واسرته
طلع المجرم دا طيار فى الجيش
وفورا اتحال للمحاكمة العسكرية
هو والمجرمين اللى كانو معاه من اسرته ..
مفيش حد فوق القانون
وخلص زمن انت مش عارف انا مين ..
انت مين يعنى - مجرم طلما لا تحترم القانون والناس
الملفت ان الإحالة تمت فى ساعات
اسرع إحالة للمحاكمة فى التاريخ
لحد هنا شئ جميل ومشرف ويطمن ان فى دولة قانون ".
وأضافت "أبو القمصان" لكن فيه بقى مجرمين اخرين مطلوقين على الفيس بوك والانستجرام يكتبو بوستات من نوعيه انتى فين يا نهاد ، المجلس القومى للمراة فين ؟؟؟
(على طريقة انتى فين ياجهاد )
مبدئيا انا محامية حرة بشتغل فى مكتبى - مش عضوة فى المجلس القومى للمرأة
وان كنت افتخر بالدفاع عن كل البنات والستات والرجالة المحترمين كمان
ثانيا ليه بقول مجرمين مطلوقين على الانترنيت ؟ لان دى بوستات تهكم وتريقه وزيطة للهجوم على الدولة والقانون والجيش والمجلس القومى والجمعيات النسائية مش اكثر
لا بيدافعو على الممرضات ولا اى بنت او ست
بالعكس كثير منهم متحرشين اصلا
واحدة ردت على حد
بتقوله : اتحول للمحاكمة
ورينا انت الرجولة فى الدفاع عنهم .
كان رده عليها
قالها ( تعالى اوريكى الرجولة وهاتى حبوب منع الحمل معاكى )
هو دا اخره .. عرض نفسه كداعر فى بيت دعارة
واجبن واضعف من انه يسيب الكنبة اللى قاعد عليها بالموبيل
النوع دا لازم يتحال للمحاكمة هو كمان كداعر ومتحرش
مش انه يعمل مناضل على الفيس بوك والانستجرام ولو اتقبض عليه يعمل فيها شهيد ومناضل
فى النهاية
الهجوم على الممرضات او الاطقم الطبية جريمة عقوبتها مشددة
وانا تحت أمرهم ويشرفنى الدفاع عنهم متطوعة
وشكرا للى احال المجرمين للمحاكمة العسكرية
لاعلاء دولة القانون والعدل.
وأشارت عضو المجلس القومى لحقوق الإنسان إلى ان"المجلس القومى للمراة ووزير الصحة طلعو بيانات بتاكد ان محدش فوق القانون.
وعندى ملاحظات عامة
اولا : دى واقعة ثبتت صوت وصورة
ثانيا : الممرضات لو اهملو مش مبرر للاعتداء
الناس اللى مش مجرمة ليها طريقة تانية بتاخد حقها بيه
ثالثا : لو الممرضات اعتدوا
وتحولت لمشاجرة حتى لو معاه عذر لكن ضرب بحزام او ادوات
بيحول الشخص من مجنى عليه الى متهم هو كمان
رابعا : استخدام حزام واللا كرباء زى ما البعض بيقول
دا تلويح بالقوة يعاقب عليه قانون الارهاب
خامسا : التعدى على الاطقم الطبية جريمة مشددة
سادسا ودا الاهم : الجرائم اللى فيها طرف عسكرى حتى لو الشاكى تنازل ، بتكمل المحاكمة علشان عندنا ( شرف العسكرية ) والقانون اعلى من اى حد
الناس كل ما بتكون فى موضع المسئولية
لازم تكون اكثر قدرة فى التحكم والتعامل باحترام .
