بحلول شهر رمضان المبارك، لجأت العديد من ربات البيوت إلى البحث عن أكثر الوصفات والأطباق الاقتصادية، خاصةً فى ظل ظروف ارتفاع الأسعار، الذى تشهده الأسواق فى الوقت الحالى.
وفى هذا السياق، تحدثت «المصرى اليوم» مع بعض ربات البيوت، اللاتى شاركن وصفات التوفير الخاصة بهن، ومنهن أسماء عبدالقادر، أم لطفلين، التى قدمت وصفة كفتة الأرز، قائلةً: «كفتة رز وقرص من الأكلات السهلة جدًّا، والسريعة جدًّا فى التجهيز، ووجبة غذائية متكاملة فى حد ذاتها».
وتابعت حديثها موضحةً المكونات، وهى: «2 كيلو أرز بلدى منقوع لمدة 10 دقائق، وكيلو لحم مفروم، وبصلة كبيرة، ونصف رأس ثوم متوسط، و4 حزم من الكزبرة الخضراء، وملح، وفلفل، وكمون، وبهارات محشى، وكزبرة جافة».
وعن طريقة التحضير، قالت «أسماء»: «بنقطع البصل والخضار، ونقلب كله فى بعضه، ونفرمه فى مفرمة اللحمة، بفرم نص الكمية ناعم أوى للكفتة، ونصها خشن شوية للقرص، الكفتة بتتحمر فى الزيت، أو تتحمص فى الفرن، لو عايزين كوليسترول ودهون أقل».
أما عن طريقة التخزين، فتابعت: «بعدين الكفتة تتعبى فى الأكياس، أما القرص بحفظها زى ما هى فى أطباق فويل، واطلّعها على التسوية».
فيما شاركت إيمان جادو، ربة منزل، وصفة «الناجتس» الاقتصادية، قائلةً: «دى تنفع تتفرز لرمضان»، موضحةً المقادير، وهى: «صدر دجاجة، حبة بطاطس، جزرتان، 2 حبة كوسة، بصلة، ملعقة صغيرة ملح، ملعقة صغيرة فلفل أسود، نصف ملعقة قرفة، نصف ملعقة زنجبيل، نصف ملعقة صغيرة بابريكا، ملعقة كبيرة بقسماط ناعم».
واستخدمت «إيمان» لتغليف الوصفة «كوبًا من الدقيق، مضافًا إليه الملح والفلفل، وبيضة على نصف كوب لبن، ورَشّة ملح وفلفل، و(كريسبى ناعم) من محال العطارة، وكوب بقسماط ناعم».
وعن الطريقة، قالت: «بقطع البصل والجزر والكوسة، وافرمها كويس فى الكبة، وبعد كده أنزل عليها بالفراخ، وافرمها كويس، بعد كده أنزل عليها بالملح والفلفل الأسود والقرفة والزنجبيل والبابريكا ومعلقتين كبار بقسماط ناعم، واخلطها حلو، وادخلها التلاجة لمدة ساعة».
وتابعت: «بعد كده أشكِّلها، وانزل بيها فى الدقيق، وبعدين البيض واللبن، وبعد كده الكريسبى على البقسماط الناعم، وانزل بعد كده فى الزيت السخن، وبضيف عليه معلقة صغيرة سمن بلدى بتظبط الطعم أوى».
بينما قالت نرمين سيف: «بسبب ارتفاع الأسعار، هستغنى عن العزومات فى رمضان ده، وهقنِّن كميات اللحوم والفراخ، بدل ما كنت بعمل جوزين حمام، هعمل جوز واحد، وهكمل بخضار، وبالنسبة للعصير هعمل صنف واحد، وهستغنى عن الحلويات».
وأضافت: «اتفقت مع الأهل والأصحاب ان الهدية اللى تيجى تكون حاجة تنفع البيت أو الشخص، والهدايا لازم تكون مفيدة، مش فقط شوكولاتة وحلويات».
أما عن التخزين، فقالت: «أرصّها فى أطباق فويل، وبين الرصة والتانية أفرد كيس تلاجة، واحتفظ بيها فى الفريزر، وساعة الأكل بطلّع على الزيت».
