كتب - محرر الاقباط متحدون
شهدت منصات التواصل الاجتماعي تعاطف كبير مع الطبيبة عزة تاج الدين التي قالت انها تعرضت للتعنيف والضرب المبرح من زوجها ما أدى لهروبها قفزا من نافذة المنزل .
وبحسب تقرير مصور لفضائية (العربية)، كشفت الطبيبة الشابة اسبابها على فيسبوك، وقالت ان زوجها الطبيب يعتدي عليها ويستولى على راتبها ، وجاء بنص منشوراها :
تعديل : للناس الي فهمت اني بغلط فى زميلنا د عمرو انا مقدرش اقول فى حقه ربع كلمه الراجل محترم للى يعرفه و عامله و الي ميعرفوش و جوزي منه لله هو الي استغل اني قاعده فى اوضتي و برضع ابني الصغير و دخل نتش الموبايل و جري عشان يمسح الي عليه قبل الرجاله متتجمع للقاعده عشان ميبقاش معايا دليل ضده و طلعت اجرى وراه و ربنا ميكتبها على واحده فيكم و لا يهتك سترها انا الى عمري محد شاف شعري و لا جسمي .
بقيت اجري وراه عشان الحق منه الموبايل و هو على كلمه واحده امسكها يا عمرو امسكها يا عمرو و دكتور عمرو مش محتاج شهادتي فى حقه و لا اخلاقه بس المنطقى انه هيمسك مين الضعيفه و لا المفترى .
التعديل ده للتوضيح فبلاش لو سمحتوا حد يغلط فيه و لا فى زوجته و اعذرونى لو كانت الفاظي فى البوست غير واضحه و فهمتوا منها حاجه تانيه . ربنا اعلم انا بكتب ازاى اصلا و فى وضع عامل ازاي لكن دي شهادة حق عسى ان ربنا يسخرلى الي يرد غيبتي للكل الي يعرفني و ميعرفنيش.
انا الدكتوره عزه حسن عبد الحليم أحمد تاج الدين طب اسكندريه دفعة ٢٠١٤ مسجله ماستر على وشك المناقشه ان شاء الله فى طب الاطفال و حديثي الولاده و ساكنه فى ١٤ مكرر ش عرفى سبورتنج الصغرى الاسكندريه.
و بكامل قوايا العقليه طالعه احكيلكم حكايتي و الظلم الى واقع عليا من جوزى المحترم الدكتور ابن الدكاتره الى مستبيح مراته و عمال يهري فى جتتي كل يومين علقه و ياخد مرتبي و يذلنى على المصاريف بتاعة الاولاد و لا لقياله كبير و لا رادع و للاسف الشديد مفيش حد من أهلى مالى عينهم و للي شافوا بوستاتي و الفيديوهات السابقه كنت بتعرض فيها للعنف و الضرب و اخدوا مني موبايلي امبارح و مسحوا الفيديوهات و ضغطوا عليا للتصالح مع جوزي المحترم الي قام يلطشني قدام امي و ولاد عمامي محدش حاشه عنى و امي المحترمه عشان تشتري ود حمايا و حماتي فى وسط القاعده الي متجمعه ضدي قالت و اقرت بنفسها( انا جيتلها لقيته ضاربها و قلتلها عيشي يا بنتي كلنا اتضربنا ) .
و لما قلتلها كويس انك بنفسك ذكرتي انه ضاربني اكتر من مره مش خايفين اموت فى ايده ردوا و قالولي محدش بيموت ناقص عمر. فلما امى تقول كده متوقعين بقية الرجاله ردهم كان ايه . قومى صالحي حماكي حتى لو ضربك هو زي مكان ابوكي و انتي غلطانه انك تحوشي عن نفسك و تصرخي و الناس تسمعك و هو بيضربك فضحتي نفسك و فضحتيهم فى الشارع .
ده رد الرجاله المحترمين الي جايبنهم و مرتبنلي القاعده و قالولي لو مش عاجبك العيشه قومي معانا و سبيلهم عيالهم يعني يا اما اقبل الذل و الاهانه و الضرب و الخوض فى عرضى من جوزي و اهله يا اما اسيبلهم العيال و اسافر مع اهلى هى دي الاختيارات الي ادوهالى امبارح .
نسيت اقولكم عندي ٣ اطفال ٤ سنين و سنتين و نص و ٦ شهور . المفروض اقبل و اسيب عيالي و اروح معاهم و ابني رضيع و لا اقعد و اقبل التلطيش و الضرب من جوزي و ابوه و امه كل شويه و مفتحش بوقى عشان هما زي بابا و ماما و الاصيله تعيش و تستحمل و كل الستات بتنضرب اشمعنى انتي عامله مشكله .
تخيلوا لما يكون سبع رجاله و امك فى الجلسه كلهم بينهشوا فى لحمك، و قبل منهم بساعتين صاحب جوزي المحترم الدكتور عمرو وحيد Amr Wahid الي جاي عشان يكتفني و جوزي يخطف الموبايل و يطلعه لاهله عشان يمسحوا البوستات، و يقوله امسكها يا عمرو امسكها يا عمرو و عمرو فعلا نفذ و مسكني فعلا و كتفنى فعلا له .
جوزى الي ملوش خلى صاحبه و انا بشعرى و برضع ابني يدخله عليا، تخيلوا حجم الضغوط دي كلها و تجمع كل الاطراف دول ضدي . حسبي الله و نعم الوكيل .
ان ضيعني اهل الارض لن يضيعني رب السماء . انا مش هبطل كلام و لا هبطل بوستات و اليوم الي هبطل فيه اعرفوا انى اتاذيت و حصلي حاجه من جوزي المحترم او حمايا الاستاذ الجامعي و حماتي الاستاذه الجامعيه الي بيقولولى هنرميكي فى الشارع للكلاب حتى لو هنتبرع بالعماره للجمعيات الخيريه عشان متلاقيش مكان تقعدى فيه .
طب انا و رخيصه عندكم . بالنسبه للحمكم ال ٣ عيال هترموهم فى الشارع هما كمان . و انتهت الجلسه على انى اصالح حمايا و حماتي و جوزي و انهم هيطلعوني فى شقه ايجار بره بيت العيله .
هى دي حكايتي يا جماعه لو واحده فيكم جوزها او باباها او اخوها او اي حد من طرفها فى الشرطه تساعدنى هيكون جميلها فى رقبتي طول العمر و الى مش هتعرف تساعدنى تدعيلي. انا محتاجه دعواتكم انا و ولادى.
أقامت عزة حسن دعوى خلع ضد زوجها لكن مع فشل محاولات الانفصال اضطرت في النهاية لصنع حبل من الملابس لتهرب من النافذة، لكن انقطاع الحبل أدى الى اصابتها خلال الهروب.
وقالت عزة في تصريحات متلفزة وهي تعاني الالام الاصابة :" انا دكتورة عزة حسن عبد الحميد ، وعرفت من زمايلي ان جوزي فتح موبايلي وبيبعت منه اسكرين شوتس على جروب الدفعة بتاع الواتس اب اي حد تجيله اي رسالة لو سمحت يا جماعة الرسايل دي انا مش مسؤولة عنها.
وقالت والدة الدكتورة عزة :" بنتي في مستشفى وحالتها الصحية سيئة بتعاني من كسور وآلام مبرحة بعد سقطت من البلكونة وهي بتحاول تهرب من زوجها اللي بيضربها دايما .
صور سقوط الطبيبة انتشرت على المنصات الاجتماعية ولاقت تعاطفا كبيرا من الرواد .
وفيما يلي تعليقات بعض رواد التواصل :
ايه كميه الجبروت اللي حصل للرجاله حسبي الله ونعمه الوكيل في كل ظالم كم من مشاكل زوجيه وتعدي وقتل لا نمنع بقي الزواج.
حبيبتى ربنا يعينك ويقويكى ويقوى كل واحد على شيلته.
في أشكال بتضحك معرفش على ايه نحب نقولهم عقبال عندكم طالما مفيش احساس.
ربنا يقومها بالسلامه ويرجعها لأولادها على خير.
