كتب - محرر الاقباط متحدون ر.ص
وجه مطرب المهرجانات "حمو بيكا" رسالة لطلاب الثانوية العامة و الكليات" وذلك عبر صفحته على فيسبوك، وجاء بنص الرسالة :
هو انا اه مش متعلم و اخدت ( محو الأمية ) بالعافية لكن ده مش حاجه تفرح ولا تقول ( عندك بيكا اهو مش متعلم بس ناجح ) ، صدقوني و الله طعم النجاح مع العلم مختلف تماماً عن طعم النجاح من غير علم.
العلم بيفرق في كل حاجه في الدنيا ، كمية معاناه بشوفها يومياً بسبب اني مش متعلم كبيرة اوي مش بتمني حد منكم يشوفها أو يتعرض لها ، العلم بيستر كتير اوي و بيخليك واعي و متفتح في كل مجالات الحياة.
هو اه الشارع علمني كتير ، بس مش زي المدارس و الجامعات ، حتي لو مش هتشتغل بشهادتك و حتي لو دخلت كلية مش بتحبها ، بس يكفي انك متعلم و معاك شهادة تقدر تسد بيها عين الشمس .
اتعلموا و خلوا بالكم من تعليمكم و شهداتكم لأنها هتفرق كتير اوي معاكوا و مع عيالكم بعد كده .
انا اه مادخلتش مدارس و ماتعلمتش ، بس حابب كل اللي حواليا ناجح و متعلم و اوعي يوم تقول اهو فلان ناجح بس مش متعلم ".
