ماجد سيدهم
وفجأة طلع فيديو ولف السوشيال ميديا في لحظات وحط على ملايين من بيوت المحروسة ..
فيديو طبيعي لزوجين أسوياء ..لكنه قلب الدنيا على كل المديا   لأنه خبط فجأة على القيح اللي في البيوت وكشف عن شرخ حاد في النفوس وحرمان مرعب في شرايين العلاقات 
 
ودا مش علشان شريكين بيرقصوا بحب واضح جدا  في فرح بنتهم.. ولا دي مشاعر  ظهرت في وقتها.. لكن علشان المقطع  أعلن بكل بوضوح عن طبيعة الحياة الحلوة والعلاقة الشيك اللي  بينهم والتقدير والحب والاحتواء اللي واجه بيوت المحروسة بدون إنذار  ودا اللي وجع وحسر ناس كتير أوي أوي وجابنا لمس أكتاف ..
 
 أيوه هي دي حقيقة بيوتنا  اللي فكرنا لما  ننغمس أوي في مشاكل الفقر والتعب والغلاء والمسؤوليات وفوقهم التقوى المزيفة   أننا بكدا مستخبين وأننا تمام ..وأول ما  طلع علينا فيديو الطبطبة دا  في لحظة اتنفض عننا التراب اللي كنا دافنين راسنا فيه ..
 
ماحدش يقول ظروف الحياة والمعيشة هي السبب ..لأ لكن لما انجرفت العقول واتشوهت الأفكار  اللي اتحشت بالجهل والعيب  وسوء الفهم والعناد وفوقهم برضة شوية التقوى بكينا واتحسرنا على  نفوسنا وبيوتنا المهزومة ..حتى اللي اعترض بسبب نعرة التقوى فدا مش أكتر من مقاومة الفشل اللي من جوه ..
 
لو الحياة ببن الزوجين مش كدا تبقى بلاها عيشة ..
 
الحب بيصغر الوشوش وبيطول العمر وبيخلي العيون بتملع والضحكة  طالعة م القلب وبيحسن الصحة والنفسية وبيحلي الحياة ودا بيوصل للناس صح ..
دمتم في حب وطبطبة..