بقلم : مهندس عزمي إبراهيم

لمن يتلاعـب بهويـة مصـر ويدعـوها عربيـة، سـواء عن جَهْـل أو عن عَمْـد
***
لازم تعـرف ان ولائي لوطــني حقيــقي
ولازم تعـرف ان طريـق الحـق طريـقي
وان طريقــك هـُوا طريــقي
وانت أخويا.. أخويا شقيقي
***
أمـِّــنا مصـر وابونــا النيــل
وتاريخنـا في وطنــَّـا طويـل
وكفاحنـــا من أجلـــه دليــل
ديـني انا قبـطي، وطبعاً مصـري، ومصري وبس
ودينــك مسـلم... طبعــاً مصـري، ومصري وبس
لا بتحويـر ولا بتزويـر
ولا بالـزق ولا بالعافيـة
بالجغرافيـة
عِـلـْـم حقيـقي
أنـا أفريـــقي وانـت افريـــقي
وانـت أخويـا.. أخويـا شقيقي
***
راح احكيلــَـك مَثَـــــل إنسـاني
فريق بريطاني وفريق أسباني
هَجَـروا بلادهـم، عبـروا البحـر اكتشفـوا امريـكا
استوطنـوا فيـها وعَمـَّروا فيـها
وزَرَعـُوا وبَدَعـُوا
ورسموا وصنعوا
ملاييــن مصنــع... أو فابريـكا
بغـَضِّ الطـَرْف عن البوليتيـكا
هـل أولادهـــم بقـوا بريطــان؟؟
وهـل أحفــادهم بقـوا أسبــان؟؟
قـول الحـق!
طبــــعاً لأ!
***
فيـها المَجـَـري وفيـها الصيني
والمكسيكي والفيليبيني
وفيـها روس ويابــان وهنــود
وفيـها دروز وعــرب ويهــود
كل مواطــن
كل مواطــن صـار أمريكي
وبس أمريكي
***
هـل علشـان دينــك إسـلام... بقيـت عربي!؟
طب لو صيني اتحَول مسلم... يبقى عربي!؟
ولو صهيـوني اتحَول مسلم... يبقى عربي!؟
قـول الحـق!
طبــــعاً لأ!
والا عشـان بتحـكي عربي... بقيـت عربي!؟
طـَب لو صيني اتعَلـِّم عربي... يبقى عربي!؟
ولو صهيـوني اتكلـَّم عربي... يبقى عربي!؟
قـول الحـق!
طبــــعاً لأ!
والا عشـان الغــَزُو العَرَبي.. بقيـت عربي!؟
احتلــُّونا يونـان ورومـان وبريطـان
هل من حـق المصري يقـول
احنـا يونـان أو طليـان أو بريطـان!؟
قـول الحق!
طبــــعاً لأ!
***
أمـّـا الأديــان!!
إن كانت بركـة ونعمـة وخيــر.. للإنسـان
ليه نعملـها سـبب للفُـرقـة وبـاب للنحـس
أنـت مصـري ومصـري وبَس
وأنـا مصـري ومصـري وبَس
كفـايـــانا جهــل وفتــنة ودَس
***
شـوف كـام دولـة في دُوَل العـالـَم
ناسـها بتحكي بلسـان واحـد
ومعظمهم.. على ديـن واحـد
بس وفـــاء الفـــرد لوَطــَنـُه
يفخـَـر بيـه.. ويرفـع شـَـأنـُه
***
قوللي ازاي باللي غزانـا
وجـا على مصـر وداس واستعمَـر
نقـدر نفخـَـر
دا احنا نبـقي بمصر بنكفـَـر
نبـقى بنشـْرِك.. نبـقى بنغـْـدُر
عصـر الجهـل عَــدَّا وفــات
وانـا وانـت عمرنـا اخـوات
نتبــع شيــخ... نتبــع قسيـس
من غيـر فلسـفة.. أو تدليـس
احنـــا أولاد ميــنا ورمسيس
***
إن كان على دينـك، ما تسيبهـوش
وان كان ع الــرب، ما تهملهـوش
لكن المصري أخـوك تآخيـه
ووطنــك تاجــك تفخـَـر بيـه
وطنك اللي بتاكل منه وعايش فيه
وطنـك بيتـك تخلص ليـه
ولا تشـرِك فيـه
***
خلـّي ولاءنا لمصر، وبس
فـلا رومـان ولا هكسـوس
ولا بـلاد أكلـــها الســوس
لا عـربيــة... ولا غـربيــة
لا من آسـيا ولا بلاد تانيـة
هـِيَّ دي روح الوطنيــة
مصـر أعظـم من أعظمهم
مش تزويـر... بل بجـدارة
ليها تاريخ رائـع وحضارة
مصـر منـــارة
دايمـاً شـعلـة للحريـة
مصـر قـلعـة أفريقيـه
لقبـطي ومسـلم ومِلـَـل تانيـه
***
منذ البـدء لو تتصَـوَّر.. لو حتـدَوَّر
مصـر مكانـها ما عُمـره اتغيـَّـر
في الجغرافيـا تــاج أفـريقيـة
وفي التــاريخ عاليـة وباقيـة
***
من أعماق روحي ومن قلبي
وحيــاة مصر.. وحيــاة ربـِّي
أنـا باحــاول ألمــس عقلـــك
أنـا باحــاول أكســب قـلبـــك
أنـا أفريــقي.. وانـت افريــقي
وانـت أخويـا.. أخويـا شقيقي
ونفس طريقـك هـُـوّا طريـقي

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :