كشف الإعلامى "عبد الرحيم على" خلال برنامجه "الصندوق الأسود على قناة "القاهرة والناس" عن إتصال هاتفى بين أحد أعضاء 6أبريل وبين الناشطة السياسية "أسماء محفوظ" حيث يؤكد لها أنهم قد أقتحموا جهاز أمن الدولة وحصل على ملفات – بها فضائح- لمؤسس الحركة "أحمد ماهر".

ونص المكالمات كالتالى:

سوكة لـ"أسماء محفوظ":

أسماء محفوظ: إيه يا باشا .. إيه الأخبار

سوكة: تمام الحمد لله

أسماء محفوظ: إنت فين

سوكة: أنا في أمن الدولة لسه .. مروح أهه

أسماء محفوظ: لاظوغلي ولا مدينة نصر

سوكة: لا مدينة نصر

أسماء محفوظ: آه طب الناس راحت على لاظوغلي

سوكة: فتحوه ولا لسه؟

أسماء محفوظ: لا لسه .. آه رايحين.. خلاص شوية وهيفتحوه.. بس منا كلمت كلمت كذا حد.. قولت لهم والنبي هتولي الملف بتاعي

سوكة: لا الملفات بتاعتنا كلها هنا

أسماء محفوظ: هنا فين في مدينة نصر؟

سوكة: آه

أسماء محفوظ: شوفت ملف أي حد فينا

سوكة: لا مكالمات تليفون بس اتحكالي عنها يعني

أسماء محفوظ: اتحكالك عنها إيه زي مين؟

سوكة: يعني اللي هو .. مكالمات تليفون ليا

أسماء محفوظ: إيه ده ليك؟!

سوكة: آه

أسماء محفوظ: لا يا راجل!

سوكة: آه والله.. كمية مكالمات تليفون كتير جدا جدا جدا جدا جدا جدا ليا متفرغة "تفريغ نصي"

أسماء محفوظ: يا لهوي طب وأنا؟

سوكة: لا إنتي لا 

أسماء محفوظ: ماهر قال لي إني في لاظوغلي

سوكة: ما أكيد كلنا في لاظوغلي أكيد

أسماء محفوظ: إيه!

سوكة: لينا ملفات.. أنا بتكلم على الحاجات اللي هنا

أسماء محفوظ: أيوه يعني

سوكة: لقيت ملف كارثة .. ملف أنا اللي لقيته 

أسماء محفوظ: إيه .. مين؟

سوكة: ملف لماهر وباسم وأمل شرف

أسماء محفوظ: إيه ده إيه بقى؟

سوكة: فضايح يعني 

أسماء محفوظ: لا يا راجل!

سوكة: آه والله

أسماء محفوظ: تأليف ولا ده بجد ولا إيه

سوكة: لا ده بجد .. وماهر حتى ما انكرش 

أسماء محفوظ: إنت كلمته 

سوكة: آه كلمته

أسماء محفوظ: قالك إيه؟

سوكة: قال يا لهوي .. اتفضحنا .. قولت له متقلقش مفيش حد خد باله .. مفيش حد قرأ حاجة أنا اللي قريت .. وكمان معايا ورق بس مرضتش أقول إني معايا ورق خالص.. ومصطفى ماهر لقى حاجات شخصية لإسراء وماهر.. مرضيش يقول لي عليها ومرضيش يورهالي.. قالي حاجات شخصية .. بس في واحد صور الملف ده وهيبعتهولي النهارده.. والورق اللي معايا بقى شيلته.. الواد أساسا اللي كان معايا ده هو عارفهم.. واد من الناس القديمة.. اسمه إسلام سعيد

أسماء محفوظ: معرفوش

سوكة بقولي يا لهوي يعني احنا كنا بنفتكرهم ناس كويسة طلعوا كده.. عشان تعرفي بس لما أنا أقولك حاجه يبقى تسمعي كلامي وتبقى صح.. وماهر مكدبش خالص وأكدلي بطريقة كلامه إنه عمل كده والمعلومات دي صح.. المعلومات دي صح مليون في المية

أسماء محفوظ: إنت شفت كل ده ولا اتحكالك

سوكة: آه قريته بعنيا .. أنا دخلت الأرشيف يا بنتي

أسماء محفوظ تخاطب والدها أثناء المكالمة قائلة: ده سوكة .. جوه في أمن الدولة عمال بيقرأ في ملفات .. دخل الأرشيف عمال يقرأ في ملفات .. بيفرغوا مكالمات التليفون يا بابا

أسماء محفوظ: قدامي ساعة ونص وأنام.. باي باي

سوكة: ماشي هبقى أكلمك .. باي باي.