خاص الأقباط متحدون
واصلت صحيفة "الوطن" نشر بعض التسريبات التى تخص الرئيس المعزول، محمد مرسى ونشرت هذه المرة تسريباً يتحدث فيه مع المحامين الذين يترافعون عنه، عن المشير السيسى والذى قال عنه أنه "إذا راح فى داهية هنطلع المساجين وهنوقف الموت اللى فى الشوارع"..ونص الحوار كالأتى:
 "مرسى": أنا عايزكم تتناقشوا، إذا هذا الانقلاب استمر، فلا قيمة لكل هذه المحاكمات، وإذا الانقلاب انقلب، فلا قيمة لها أيضاً، يعنى فى كلا الحالتين لا قيمة للمحاكمات، ولا للدفاع ولا لأى حاجة

- صوت أخر: هو فعلاً..

"مرسى": فإذا استمر السيسى فى مكانه، القعر بتاعه لسة ما بانش، هيجيب لكم من تحت الزبالة، ولا قيمة العيال دول المحامين دول والقضاة دول ولا يساووا (...)، معلش الجماعة دول مش سامعين، وإذا راح فى داهية وغالباً هيروح فى داهية فيبقى مالهاش قيمة برضه، فنخلّص إحنا الناس المحبوسين الغلابة، واللى بيموتوا فى الشارع دول كل يوم، فنوقف الموت ده، كفاية الموت، اللى مش عارف مين، والتانى اللى مات قريب، اسمه إيه؟

- صوت 3: محمد سعيد..

"مرسى": محمد سعيد، هتحاول تلملم الجراح دى إزاى، مش عارف فى البلد دى، الله أعلم بكرة هيحصل إيه، وبالتالى شوفوا انتم كمحامين، أنا رأيى أن لا محامين ولا نوجع دماغنا.

- صوت أخر: إحنا فى هذا الرأى مع حضرتك.

"مرسى": إحنا بس كان مهم جداً إن إحنا نوضح زى ما الدكتور سليم النهاردة، ولو إنه عند المادة 86 وما كملش، نسى، الله أعلم، لأنه كان مفروض يقول بقى أنا حاسس بالحرج، باتكسف أتكلم م المادة 86، اللى هى إيه بقى، إن اللى قام بالانقلاب يعنى يؤخذ عليه إن يجرى له اللى جرى لغيره مش كده، لكن على أى حال خلاص، هو ده اللى حصل، هو وضّح، وأنا كنت عايز أضيف، لأنى طلبت الكلمة، فأنتم ما قلتوش ليه للقاضى؟

- صوت آخر: إحنا طلبنا أكتر من مرة بس هو حضرتك..

"مرسى": أنا عايز أضيف إن إبراهيم صالح (المحامى العام الذى كان يحقق فى قضية الاتحادية) كداب، لازم تقولوا انتم كده، إبراهيم صالح كداب، عارفين كداب إزاى؟، جالى لما جيت عشان التحقيق، قال لى أنا فرحان إن أنت رئيس الجمهورية وبتصلى الفرض، قلت له يا ابنى أنت ليس لك حق تقابلنى، عشان كده....... ده إجراء مش موجه لشخص بعينه، قال لى طيب أنا فاهم ده كويس هو كان جاى يحقق مع الطهطاوى ومع أسعد، قال لى أنا هاقرا لحضرتك من باب إن أنا أحيطك علماً باللى موجود، وقال لى الحقيقة الشهادة لله أنا كل اللى سألتهم فى رئاسة الجمهورية، قائد الحرس، ورئيس أمن الرئاسة، كلهم شهدوا بإنك أنت نبهت عليهم كلهم واحد واحد ممنوع إراقة دم أى واحد، الحقيقة دى شهادة أنا كده الكلام كده، وفى الآخر بعد ما قعد يقول لى مش عارف إيه، ومين بيقول إيه، وأفاد مش عارف مين، شوية كلام ييجى ساعة، قال لى فى الآخر أنا ما عنديش لحضرتك لا سؤال ولا اتهام، دى المرة اللى شفته فيها.

 

 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :