كل الناس والصحافة بيلسنوا ( لامؤاخذه ) على الهضبة عمرو دياب والكينج محمد منير ومش عارف أمير الطرب والمغني نجم الجيل وحاجات من دي كتير وبيسألوا " همه فين .. مش ده وطنهم اللي محتاجنا كلنا واحنا بنحاول نخرج من أزمنة المحن المختلفة  ؟!" .. و الحقيقة ده عادي لما يكون " الهضبة" وفور إطلاق الاسم ده يصرح لوسائل الإعلام المختلفة مُعرباً عن استيائه من العندليب عبد الحليم حافظ إذ كيف يمكن قبول أن يُغني مطرب للسد العالي ، وغيرها كتير من الانتقادات لهضبات وجبال شامخة قالوا وغنوا ولحنوا ولم تحفر في وجداننا ووجدان الأمة ما يخلدها .. 
 

أما الكينج " محمد منير" اللي غنى أيقونة ثورة يناير ( أغنية "ازاي" كلمات نصر الدين ناجي ألحان وتوزيع أحمد فرحات إخراج هادي الباجوري ) ، فلا أعلم سر غيابه عن وطنه بعدها ، وهو من غنى للوطن ولكبار من كتبوا ولحنوا للوطن .. أين زميلي في كلية الفنون التطبيقية الذي كان إذا غنى تغنى بأغانيه في حب الوطن وأهل بر مصر كل طلاب جامعات البلد ، بل وكل شباب مصر !!..
 

ليلة ثورة 25 يناير 2011 غنى الناس في الميدان والبيوت وفي كل حواريكي يامصر..غنينا معاك يا كينج..أغنية "إزاي ترضيللي حبيبتي / اتمعشق في اسمك وانتي / عمالة تزيدي في حيرتي / ومنتش حاسة بطيبتي ازاي/ مش لاقي في عشقك دافع / ولاصدقى فى حبك شافع/ ازاي انا رافع راسك / وانتي بتحني في راسي ازاي/ انا اقدم شارع فيكى / وامالك من اللى ماليكى/ انا طفل اتعلق بيكى/ فى نص السكه وتوهتيه/ انا لو عاشقك متخير

/ كان قلبى زمانه اتغير/ وحياتك لفضل اغير فيكى لحد مترضى عليه.."  

عموماً ، سيبك من الجيل ده اللي دخل سن الستين ، فين الشباب اللي غنى للوطن وفي مقدمتهم من غنى" فلان الفلاني " ..واسمح لي عزيزي القارئ أفكرك بكلماتها ..

تقول كلمات الأغنية ، وما أروعها ..

فلان الفلاني اللي كان يومها جنبي

ساعة لما بدأوا في ضرب الرصاص

فلان الفلاني اللي معرفش اسمه

ف دايما بقول يابن عمي وخلاص

فلان اللي سابلي بقيت سندوتشه

ليلة لما شافني بغنّي و جعان

فلان اللي مش فاكرَه غير شكل وشه

فلان اللي عداكي جوه الميدان

فلان اللي فتشني بالإبتسامه

فلان اللي قال هو فعلا حيمشي ؟

فلان اللي قاللي طريق السلامة

ساعة لما قولنا زهقنا وحنمشي

فلان اللي مرضيش ياخد مني أجره

ساعة لما قلت إني رايح مظاهره

فلان اللي قاللي حيتنحى بكره

وحنفرح و نرقص و راح تبقى سهره

فلان اللي بالفيسبا طالع و داخل 

يجيب اللي يتصاب من الضرب جوه 

فلان اللي ف الضرب عند المداخل 

يرجّع صحابه.. و يستنى هوّه 

فلان اللي كان بيناولني القزايز

ويقفلها بعد أما اعبيها جاز

فلان اللي يشرب ويسألني عايز ؟

فلان اللي كان وشه مليان قزاز

فلان اللي وزع عليك بطانية 

ويسأل “فيه جنبك مكان ع الرصيف ؟"

فلان اللي نازل عشان القضية 

فلان اللي نازل عشان الرغيف

فلان اللي مطلعش جوه البرامج

وكان بس صوته في قلب الهتاف

فلان اللي روح أكل واستحمى

فلان اللي ضايع في وسط ال الاف

فلان اللي غرقّلي خل الكوفيه

و شالني ساعة لما جت طلقه فيا

فلان اللي مات يومها تلزمله ديه

من ابن الفلاني اللي كل لحمه حاف

فلان الفلاني اللي معرفش اسمه

ف دايما بقول يابن عمي وخلاص

 

في أروع من كده كلام وتجديد في شكل الأغنية المصرية ؟ .. تراكيب فنية بديعة في الكلمات والألحان والإخراج الفني ، وأيضاً فنون الجرافيتي والأفلام الوثائقية .. 

ليس معنى الاختلاف على توصيف أحداث ثورة يناير ، لكنها تجاهل أن الثورة أفرزت بحق جيل جديد من الموهوبين وأرى أهمية أن تنتبه الجهات المعنية للبحث عنهم ورعاية وإعادة تقديم أصحاب تلك المواهب الفنية...