بقلم: ميرفت عياد
مبارك شعبي مصر دي آية في الإنجيل.. وكمان عملوها تراتيل.. بس الحقيقة هي ليها عندي ألف دليل.. وأنا هاشرح لكم بالتفصيل..
 
مبارك شعبي مصر.. علشان يقدروا يتحملوا الظلم والقهر.. وفي الأتوبيس الحشر.. وحوادث الطريق على البر.. وغرق العبارات في البحر..

مبارك شعبي مصر.. علشان يقدروا يتحملوا السرقة في عز الظهر.. ومرتبهم اللي بيخلص من أول الشهر.. والجوع والخزي والفقر..

مبارك شعبي مصر.. علشان هما أساتذة في الصبر.. بيتحملوا ويشربوا المر.. وهما رافعين رايات الشكر.. مش باختيارهم لكن بالجبر.. اللسان قصر.. بعد ما اتزوى الخير.. وعم الشر..

مبارك شعبي مصر.. علشان بقى زمن المكر.. واللعب بالبيضة والحجر.. والكتابة مابقتش على السطر.. بعد ما اغتالوا الفكر.. وخضعنا لولاة الأمر.. اصل اللي بيعاند بيخبط راسه في الصخر.. ولازم يرضخ للفساد والرشوة والمر.. وبعدين بيعدي العمر.. وسيبن لولادنا ثروة مهولة من الذل والقهر..

مبارك شعبي مصر.. لأن العزف بقى على كل وتر.. المهم إنك لفوق تتنتر.. حتى لو عرضت غيرك للخطر.. ولوثت الفاكهة والخضار على الشجر.. وقطعت من على الأغصان الزهر..

مبارك شعبي مصر.. أصل عدد الغلابة مالهمش حصر.. بيناموا من جوعهم من العصر.. وبيحلم شبابهم بالسفر.. حتى لو غسلوا الصحون وناموا تحت الشجر.. المهم الهروب من هذا القطر.. سواء كان بمركب هتغرق ولا حتى بقطر..

مبارك شعبي مصر ..لأن صدر أولادها بقى مفتوح لرصاص الغدر.. وساعتها بنلاقي ألف عذر.. دة مجنون أو مسجل خطر.. المهم إن الحادث يمر.. وما يتفضح السر.. إن هان علينا البشر.. في زمن ضاع فيه ضي القمر.. وانكسرت فيه قلوب المهر..

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :