زهير دعيم
طب افهم ليه ف بلدي عايش كأنى غريب
حاسس بالوحدة جواها وبتعامل بشكل عجيب
ويشوفو صليب على صدري وعلى يدى او اسمى صليب
         اعوذ بالله
ويستغفر ويتضايق بشكل عجيب

ف كراستى و درجاتى عشرة على عشرة ونجمة كمان وانا ممتاز
ووقت ما يعلنو نتيجتى يادوب ناجح وبالعافية وادور محتاس

و رحت وظيفه حكوميّة وجيت اقدم وفرحتي كانت كفرحة طفل يوم العيد
واقول خلاص الدنيا ضحكت ليَّ واقول خلاص هتهنأ بشغل جديد

ومسك الموظف أوراقي ويقلب وفجأة بص ليَّ بعينيه الاتنين وقال
اسفين  اسفين عددنا زيادة ومش عاوزين
سيب اسمك وتليفونك وادينا قاعدين
وصدفه وانا خارج قابلت صاحبي حسين
دة ياما ف الجامعة قسمنا الرغيف نصفين
جه قدم ف نفس وظيفتى وفى لحظه خلاص مقبول
لا قالو له لا ع ولا غ

يا بلدي ليه د انا بحبك
دة انا ابنك
ليه ف بردى تعرينى وانا اللى كنت عشمان تضمينى تدفينى
             ف لحظه كدة تبيعينى

لناس اغراب ينهشو ف لحمى
د انا اللى انحنى ضهرى وانا شايلك على اكتافى
وانا اللى انكوت ايدى بنار ظلمك
مع ان ف وقت مرضك كنت بدعى تتعافى

دى اخرتها ودى شكرا يا بلدى يا امي
لما جابو السيف كنتِ انتِ سيّافي
وشايفانى بقاسي وادوق المر
تنسينى ولا يهمك

لا عارف امشي فى الشارع بحريّه
وامى واختى تتعاكس والغلط هيا

وظيفه حكومية متأكد ماهياش ليا
وان مت ده كلب وراح مالوش ديّه
 
طب اعتبرينى انا مجنون وناكش شعرى وبهيس
و راجعي دفاترك وارقامك واساميكِ وحققى ودققى كويس
ده كام منصب وكام مسؤول وكام مأمور فيكِ مسيحى
وهل ينفع ف يوم فيكِ اكون لايكى نا الريس
لو منى الامانة تخرّ
وخيرى و رزقى هايعمك ورايا يجرّ
قانونك يحكمك غيرى

وحتى لو سقاكِ المُرّ
وفاكرة يا مصر بعد ده كله حالتى تسرّ
ما قلت لك تعالى نقعد ونتعاتب
بتبعدى ليه
لا انا بدور على مناصب ولا كراسي ولايقولو سعادة البيه

وليه فى بلدى تعاملينى كضيف وغريب وانا ابنك ليه
طب افهم ليه ؟
طب افهم ليه ؟
طب افهم ليه؟!!!!

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :