بقلم: مجدي إبراهيم
 الخيمه البسيطة دي اللي أنا ناصبها، مش معناها إني مش قادر أعمل صوان، دي عشان أنا متعايش مع أبناء جلدتي، وإني من ضمن البسطاء، وإن بيجمعنا سقف واحد، وإني من نفس شريحتكم.

 الرز والعدس اللي بيتوزعوا برة باب الخيمه دول مش عشان تنتخبوني، لأ؛ حاشا، أنا ابن عالم  وأخلاقي أعلى من كده، أنا بس بديكم عربون محبة إن الخير هيعم الدايرة.

 الإنجازات اللي أنا عملتها قبل ما أرشح نفسي دي كانت حاجة بسيطة عندكم، مثلاً اليافطة اللي أنا عملتها على الطريق السريع، وكتبت اسم الدايره فيها، وقلت دايرة جوز ابن عمتي ترحب بكم، وعند المطب اللي كان بيعمل حوادث كتبت: "حاسب مطب"، وفي آخر الدايرة رسمت قلبين، وكتبت: "تصحبكم السلامة".

 ده دليل قوي جدًا إني مهتم بشأن هذه الدايرة، وإن كانت الجرايد ما كتبتش عن اليفط دي؛ فأنا كفاية عليَّ إني قدام ربنا ريحت ضميري.

 بالنسبة لمكتبي اللي في الدور التالت، اللي مكتوب عليه خدمه المواطنين، أنا عارف طبعـًا إن ناس كتير جدًا من أبناء دايرتي الأحباء، جم المكتب وما لقيونيش، وكانوا فاهمين إني بتهرب منهم، أو إني مش كفء إني أنفذ طلباتهم، إنما للأسف؛ الناس دي مش بتفكر صح، أنا كنت بزور أبناء الدايرة ساعتها نفر نفر.

 وبالنسبه للدقيق اللي بتقولوا إنه بقى وحش، من ساعة ما أنا ما مسكت الدايرة ياجماعة، انتم محملين عليا جدًا، انتوا مش فاهمين إني بقيت أصدر الدقيق بتاع دايرتنا لدايرة سحلول، عشان نقدر ناخد منهم فلوس، نصرف على الكباري والمطاحن اللي هنا، بطلوا فكر خبيث وخلوا النية صافية.

 وبالنسبه للناس البطلجية اللي أنا ممشيهم معايا، أو اللي انتوا بتقولوا إني أنا محتمي بيهم، يا جماعة.. يا جماعة.. دول ناس غلابة جدًا، وما كانوش لاقيين حد يأويهم، ولا يأكِّلهم، وأنا عشان إنسان قلبي أبيض وطيب، حميتهم ومخلتش الديابة تاكلهم، ده جزائي بقى ولا ايه؟ ها؟ بس هما شكلهم كده بس، والأمور ما تتاخدش بالأشكال يا مصريين، أُمال إزاي أولاد وطن واحد؟؟ وبنحب بعضنا إزاي يعني؟؟

 لما شفتوني في الفيديوهات وأنا بتكلم، وجمبي ناس مش من مستوايا، ده معناه إيه؟ طيب؟ فكروا شويه بدل الكلام اللي عمالين تفكروا فيه غلط، ده معناه إني حد طيب جدًا وجميل، وبحب الفقرا، وكلكم فقرا، يعنى بحبكم كلكم، صح ولا إيه؟؟

 بالنسبه لليفط والإعلانات اللي أنا عاملها للانتخابات، دي فلوسي أنا مش فلوس الشعب، أبويا -الله يرحمه- كان معاه وسابلي، وأنا منكم وإليكم، ما انتوا كلكم ولادي، إيه المشكلة يعني؟

 الناس اللي على العربية النص نقل دول اللي ماليين الشوارع، وماسكين ميكروفونات وبيقولوا كلام حلو في حقي، أنا أول مرة أشوفهم، هما بس أكيد كان عندهم مشاكل وأنا بعون الله حلتها لهم، فهما بيردوا الجميل، ناس أصيلة، آه والنعمة أصيلة.

 يا ترى بعد كل المواهب والخبرات القيادية دي، تحبوا تنتخبوني ولا تنتخبوا حد تاني؟؟ على فكرة.. الرز والدقيق وشنطة الهدايا والـ300 جنيه بتوع كل منتخب، لسة ما اتوزعوش.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :