ستظهر الصفحة بشكل مختلف لآنك تستخدم نسخة قديمة من متصفح
أنترنت أكسبلورر، استخدم
التحكم فى الخط و الألوان
الكاتب
جميع مقالات الكاتب
راسل الكاتب
أحدث مقالات الكاتب:
طباعة الصفحة
فهرس مساحة رأي 
جديد الموقع
هي قصة... (مرثية شهيد على ضريح وطن)
السبت ٤ ديسمبر ٢٠١٠ -
٤٢:
١١
ص +02:00 EET
| حجم الخط : |
|
|
 |
|
بقلم: هاني رمسيس
هى قصة
مش قصيدة
مش خيال شاعر
ولا فكرة شريدة
دى عايشة وسطينا
حقيقة حية أكيدة
للبحاروة والصعايدة
فى بلاد قريبة أو بعيدة
يمكن مرة تكون بطلها
و مرات تقراها فى الجريدة
الوحوش فيها حرة طليقة
والفريسة جريحة طريدة
هى قصة
قديمة جديدة
ليها وشوش كتيرة
وروايات عديدة
بس لسه برضه قصة
مش قصيدة
*****************
كانت ضُهرية
وعلى الطبلية
كان بيرسم فى كـُراس
شجرة و بيت
و ترعة وغيط
و مِجرايا ومِدرايا و فـاس
لابس جلابية
وعلى راسه طقية
و فى رجله مــداس
من تحته حصيرة
و من فوقه خُصّ
بينفد شعاعه زى ضى المـاس
فى السقف
قِمْرّية معششة
وفى الأرض
قدرة ميه مرصرصة
وحيطة سودا قدامه من هباب الجـاز
و بابور مولع
و شباك مخلع
و باب كبير بغلقة و مـتراس
على جنب منه جورجيوس
وفيلوباتير مرقوريوس
على الحيطة فى برواز
واقفين شُجعان
واقفين فِرسان
واقفين حُـراس
الصورة كملت ؟
ولا نقول كمان ؟
الصورة واضحة من زمان ... بس فين الإحـساس !
*****************
يخبط الباب
يرزع الباب
ألف شيخ و ألف شاب
أيادى تشب
و حناجر تسب
عيون بتقدح شرار يوْلِد خراب
إفتح يا كوفتس
إفتح يا كافر
إفتح يا عضمة زرقا
(يا ابن الأكابر)
*****************
ليه يا بوي
انكتب علينا الشقا
انكتب علينا الإضطهاد ؟
ليه يا بوي
مهما مشينا
نفضل بُعاد ؟
نهارنا مغيّم
و ليلنا ما له معاد ؟
غارسين بذورنا
ما ضامنين الحصاد ؟
وليه يا بوى
حازمين متاعنا
على بلاد الشتات ؟
أو شايلين كفونا
فى انتظار الممات ؟
*****************
يا ولدى
الجبن مش إنك تموت
الجبن إنك ترضى تعيش ذليل
مش شجاعة إنك تخون أخوك
و الموت مش إن دمك يسيل
يا ولدى
الخوف ما كان لجدودك طريق
ما كان لجدودك سبيل
ما كانوا يهابوا ولا يحابوا
ولا كان ينحنى ليهم سليل
ما كانت نفوسهم فقيرة أو أسيرة
و الكتب فيها الشهادة فيها الدليل
يا ولدى
الموت هو إنك تكون قاتل
مش إنك تكون قتيل
*****************
يكسّر الباب
يحرق الباب
ألف شيخ وألف شاب
تعوى الدياب
يا كوفتس
يا كافر
يا عضمة زرقا
(يا ابن الأكابر)
*****************
تعلا الأيادى
شايلة السيوف
بقينا أعادى
ولا حصلنا ضيوف !
تعلا الأيادى
تسن المخالب
تزعق تنادى
وكرالتعالب
تعلا الأيادى
فى قلب الصبى
تغرس سهامها
تنفث سمومها
يا ويل الشقى !
*****************
بيهوى الدبيح
لا الشجرة طرحت
ولا البيت اترسم
والترعة جفت
والغيط اتردم
بيهوى الدبيح
تصرخ الأم تزلزل أعالى السما
قلبى يا حبيبى انكوى
تصرخ الأم تزلزل أعالى السما
خدوا كبدى وسيبولى الضنا
بيهوى الدبيح
تدور الدنيا ما تقف
والأب يشهق يرتجف
الدمع انحبس ما جف
و الدم حنّى الكف
يقع الشهيد
يموت البطل
لا الأرض مالت ولا الكون انعدل
يقع الشهيد
يموت البطل
لا النهاية بانت ولا الستار انسدل
*****************
كفاية يا بوى...
مش لساك قايل
الجبن مش إنك تموت
مش لساك قايل
يا ولدى جدودك أُسوُد
حفظوا إيمانهم
عاشوا وماتوا شهود
وهبوا نفوسهم
من غير حساب من غير حدود
تاريخهم بعمر النيل
وسمارهم غزل الأصيل
تاريخهم كله ألم
تاريخهم كله ظلم
كله حلاوة بطعم الخل
للأعمى ضلام بس لينا ضِل
*****************
على الطبلية كان متلوّن الكراس
بلون أحمر
طابع عليه ألف ألف مداس
و سواد الحيطة انهزم
بلون أحمر
مادرى م القلب ولا من الراس
والقِمرية هجرت عشها
طارت
ما حطت على شجر ولا حجر
ولا سفينة ولا مدينة ولا أجراس
طارت
وحارت
بتسأل
دول وحوش كانوا ولا كانوا ناس ؟
رفرف الموت بجناحين سود
خيّم ع الشوارع والبيوت
ينعق بأعلى صوت
قتلوا الوليد
دبحوا الوريد
الوِلْد تحت
وفوق العبيد !
*****************
ملعونة الأرض
لو فتحت فاها وشربت دماك
ملعون يا بيه
مهما على نجمك فوق سماك
ملعون يا غفير
يا ظابط يا وزير
ملعون يا قاضى
لو ما عصبت عينيك عن قضاك
ملعون يا وطن
لو فى يوم ضحيت أو اتبريت
أو حتى يا وطن
لو فى يوم نسيت ضناك
الأرض خافت تفتح فاها
ولا قدرت تشرب دماه
وصرخة الشهيد دوت
تطوّف محيط الظلم لآخر مداه
طافت وغاصت
فردت قلوع
ومدت دروع
وماقدرت توصل منتهاه
و الوطن لسه بيسأل
هو فيه ضحايا
هو فيه قَبَط
هو فيه للنصارى إله ؟
------------------------------------------
الطبلية : منضدة صغيرة للأكل ،غيط : حقل ، المداس : الحذاء ، مجرايا : قناة الماء ، مدرايا : مذراة ، خُص : سقف من بوص وعيدان الذرة ، قمرية : تطلق فى الصعيد على اليمامة و طائر القميرى الشبيه باليمام ، معششة : لها عش ، مرصرصة : باردة جداً ، بابور : وابور ، غلقة : أداة خشبية لغلق البوابات ، كوفتس : يرددها العامة وهى تحريف لكلمة قبطى ، عضمة زرقا : عظمة زرقاء وهى اسم وصفة أطلقت على الأقباط من جراء فرض تعليق صليب ثقيل يترك علامة زرقاء برقابهم ، (يا ابن الأكابر) : تحسراً وحزناً ، يهوى : يسقط ، الأصيل : شمس الغروب ، الشقى : التعيس ببعده عن وصايا الله ، عصبت عينيك عن قضاك : أغمض عينيه عن أى انحياز فى حكمه ويقال العدالة معصوبة العينين ، النصارى : يصر البعض على تسمية كل المسيحيين بالنصارى.
كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها
تابعونا على صفحتنا علي الفيسبوك
رابط دائم :
المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع تقييم الموضوع :
