الراسل: ماجد صالح
واحنا قاعدين على القهوة وبنشرب شيشة، ومخبيين باقى حتة الحشيشة، وكنا طالعين من صلاة الجمعة، أنا وصاحبي الواد سمعة، قلتله شفت انفجار الكنيسة خلى السنة عليهم كبيسة، سمعة قالي أكيد اللي عملوها مش مسلمين، أينعم الشيخ قاللنا إن النصارى دول كافرين، وعيالنا وعيالهم مع بعض مش لاعبين، وإن الكنايس فيها خمرة، وراس السنة بتبقى ليله حمرة، وقال لنا كمان ماتعيدوش عليهم، ولا تشتروا منهم ولا تبيعوا ليهم، وسليم العوا في قناة الجزيرة، عارف عنهم كل كبيرة وصغيرة، وقال إن الكنايس والأديرة، مليانة سلاح وتفتيشها وهدمها ده جهاد وكفاح، وانهم بيجيبوا السلاح من إسرائيل علشان يحاربوا المسلمين ويرفعوا الإنجيل.
وفي المظاهرة قلنا ياشنودة هتدفع الجزية وانت مطاطي، وقلنا هاتوا كاميليا ووفاء قسطنطين، يا هنخلي عيشتكم طين، والشيخ قال لنا إن الأديرة فيها مساجين، وانت الدولة عليهم ساكتين، وقال لنا لا نعزيهم ولا في أفراحهم نهنيهم، وقال لنا كمان إن نسائهم وأموالهم ودمهم مباح.
وأذن الآذان واحنا قاعدين، حي على الصلاة حي على الفلاح، قلت لسمعة يبقى أكيد اللي عملها مش مسلمين، وأنا والله جاتني دلوقتي فكرة نميسة، قوم بينا نفجر كنيسة.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :