بقلم: مينا ملاك عازر
هل ميدان "التحرير" بقى هو الحل لكل مشاكلنا؟ طب كان تايه عني فين من زمان؟ أنا كان عندي مشاكل كتيييير ما عرفتش أحلها. ليه ما رحتِش ميدان "التحرير" واعتصمت؟ يعني مثلاً ليه ما رحتِش الميدان ده، وطالبت يأخذ الزمالك الدوري؟ أو أن ينسحب الأهلي من كل البطولات المحلية والأفريقية؟ أو مثلاً أن نغيّر اسم "مصر" ونسميها "يوسف"، أو "همت"، أو أي اسم تاني؟ بيني وبينكم، أنا بفكر لما الناس إللي في "التحرير" دول يخلَّصوا تظاهرهم، ألم كام واحد صاحبي، وأنزل ميدان "التحرير" وأطالب بأي حاجة من إللي فاتوا دول، أو أقول لكم أنا حاطالب بأن كل إللي عملوه الناس بتوع ميدان "التحرير" يتلغي ونرجع فيه! وساعتها بقى أرجَّع الرئيس "مبارك"- ده لو مشي- وأرجَّع المواد إللي إتعدلت، وأعيَّن الناس إللي على مزاجي في الوزارة، وأمشِّي الناس إللي مش على مزاجي، وممكن أطالب بإني أهد الهرم، ونبني مكان التلات أهرامات مساكن للشباب عشان يتزوجوا، حقهم بقى يا جماعة..

لو سمحت حضرتك، أنا مش بأهرَّج، ولا باسفّه من إللي عمله الناس بتوع "التحرير"، لكن عايز أقول لكم، أنا إتعلمت إن التفاوض معناه مش لازم تاخد كل ما تطلبه.. اطلب أقصى حاجة ممكن تاخدها، وابدأ أثناء التفاوض التنازل. لكن إني أصمم على مطالبي وكل ما حد يديني طلب أزوَّد سقف مطالبي، أبقى بصراحة- ومع كامل احترامي للكل- باستهبل. وأنا مش فاهم ليه لما طرف يقدم تنازلات وموافقات للطرف الثاني يبدأ هو يزايد ويقدم طلبات جديدة؟ والحكاية بصراحة بوخت، وخابت أوي..

سامعك يا سيدي، الرئيس "مبارك" غلط ووحش، وأنا أكتر واحد هاجمته، وقلت عنه الكثير والكثير، وكتبت في مقال من مقالاتي المنشورة في الجريدة هنا "سيادة الرئيس أرجوك استقيل" فيه أكتر من كده؟ وعلى فكرة كتبت ده من زماااان فمش عايزك تزايد عليَّ لو سمحت. لكن علّموني أنه إن أردت أن تُطاع فأمر بما يُستطاع، وإلا خليك زي ما إنت في ميدان "التحرير". وبصراحة تضمنوا لي منين إنه بعد ما يرحل الرئيس ما يطلبوش حاجة تانية؟ يعني ممكن يطلبوا فجأة إن الجيش ياخد بعضه من ميدان "التحرير" ومن "مصر" كلها ويطلع يحارب "إسرائيل"! طب حانعمل إيه ساعتها بقى؟ قولوا لي يا ذوي الألباب.

أكرِّر، أنا مش معترض.. الناس دي جدعان ومية مية كمان، وزي الفل، وعلى دماغي كمان، لكن لازم يعرفوا إنهم مش لازم ياخدوا كل حاجة، وإلا فجأة مش حايلاقوا ولا حاجة من إللي طلبوها. يعني بجد يا جماعة، فكروا معايا إيه المانع إن بعد ما كل مطالبهم تتنفذ، والناس تخرج من "التحرير" ويفضى، تلاقي ناس تانية نزلت لـ"التحرير" وقفلته برضه، وطالبوا العودة في كل ما تم تفعيله من مطالب الناس بتوع "التحرير" النهاردة؟ وتفضل "مصر" بتتطوَّح بين مطالب من يحتل ميدان "التحرير"! وساعتها ميدان "التحرير" هو إللي بيحكم "مصر"، ومنْ يحكم ميدان "التحرير" يحكم "مصر"!

يا جماعة، قولوا لي رأيكم بجد، أنا مش عارف أعمل إيه؟ لازم نحل مشكلة ميدان "التحرير".. ما تقولّيش ننقل ميدان "التحرير" من مكانه ونوديه عند تمثال "رمسيس"! ولا تقول لي إننا ممكن نغير اسمه ونسميه ميدان "الملوخية"، خصوصًا إني أتوقَّع إن حايتسمى ميدان "ثورة الشباب".

كده المقالة خلصت، وحضرتك ممكن تسيبني بقى أروح ميدان التحرير أطالب بإني أبقى رئيس تحرير الجريدة دي، عفوًا يا باشمهندس عزت.. أشوفكم على خير، قصدي في ميدان "التحرير".

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :