الراسل: ماهر دانيال
مدرستي جميلة. نظيفة. متطوِّرة.. كلام جميل فين التعليم بقى"؟ في مرحلة الإبتدائي وفي حصة الموسيقى والرسم، بتيجي أبلة "سناء" في أول الحصة، يدخل عليها الأستاذ "أشرف" وفي إيده سندوتش، ويقولها: "صباح الفل يا أبلة سناء، جبتلك معايا سندوتش حلاوة"، ويقولها: "إنتي عايزة العيال دول النهاردة عشان أنا عندي حصتين عربي متأخرين عليا". ترد عليه، وتقوله: "بس الحلاوة من غير قشطة"، يقولها: "بكرة تجيلك حلاوة بالقشطة، ها هتديني العيال دي؟"، ترد عليه وتقوله: آه خدهم، دول حتى ميعرفوش حاجة في الموسيقى.. على أساس إنهم هيعرفوا موسيقى من نفسيهم. وكذلك حصة الرسم.

بجد حرام عليكم، للأسف المدرسين عندنا ميعرفوش أهمية الموسيقى والرسم للطفل، ومش عارفين إن الموسقى بترتقى بإحساسه، والرسم بيعلِّي خيال الطفل، بدل ما نحرَّك مشاعرهم كأطفال، بنجمد إحساسهم بالحفظ والصم والضرب!!!

المهم، بيبدأ أستاذ "أشرف" الحصة وعلامات الغضب على وشه، والخرازانة بتزن في الهوا لما بيلوَّح بيها. وتلقى الأطفال قاعدين على الدكة مش مركزين غير في الخرازانة، ويقولوا لنفسهم: "يا ترى أهلينا جايبنا المدرسة عشان يعلمونا ولا عشان يعذبونا"، وأستاذ "أشرف" يشرح! مش مهم حد يفهم!! ولما يسأل التلميذ سؤال وميرودش عليه المدرِّس، يقوله بكل ثقة وينفر في وشه: ما أنت سرحان!!! وعشان يشجعه يقوله: "قوم يا غبي اقف على السبورة"!!!

طبعًا الولد حافظ طالع يعمل إيه، يقلع الجزمة ويمدد رجليه عشان يتعاقب.. خلصت الحصة الحمد لله. والحصة اللي جاية ألعاب. وطبعًا عشان مدرستنا تفضل جميلة ونظيفة، إنتو عارفين إيه اللي هيحصل. وبلاش نتكلّم على المدارس الأجنبية عشان المدرسين بيقبضوا كويس وميقدروش يطلعوا الكبت اللي عندهم على العيال! لا بالعكس، دا لو عيل عمل ببي المدرس هيخدو ويغيَّرلو البمبرز ويرجعوا مكانه.. بجد عندهم ضمير.

يدخل في مرحلة الجامعة، علشان إعدادي وثانوي عايزين مجلدات. وبما إن الولاد والبنات فرقهم في مرحلة الإعدادي بقرار من الوزارة الذكية (علشان عيب)، بيرجعوا يتجمعوا تاني في مرحلة الجامعة. ودا بينتج عنه الحرمان من الطرف الآخر طول القترة دي. ويستغربوا أوي لما يحصل جواز عرفي وتلاقي الشباب في الجامعة مقضينها فسح وخروجات. ونلخص، في الآخر المهم إنهم ينجحوا وخلاص، استفادوا إيه على مدار أربع سنين؟ ولا حاجة. وطبعًا في تفاصيل في الجامعة نفسها كل الناس عرفاها. وبعد ما يتخرَّج، عشان يشتغل محتاج كورس إنجليزي، وكأنه عمره ما درس!!!

يارب الوزارة الجديدة تهتم بالمدارس إللي في عشوائيات..

 

 

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :