بقلم: إيليا مقار النهراوي

من وحي مهزلة قنا
• متظاهروا قنا بيشتكوا من عنصرية "اهل كايروا وسنين طويلة من التمييز ضد قنا... نعم؟؟؟طيب الإعتراض علي محافظ علشان ديانته، دي تبقي اسمها ايه؟
• بالمناسبة، حد شاف أعضاء المجلس العسكري؟ حد يطمنا عليهم.
• بعد كل الفيديوهات اللي منتشرة علي اليوتيوب من بعض ابناء قنا المحتجين وقطاع الطرق اللي بتلعن سلسفيل المحافظ النصراني، ينادي المحتجون بمليونية يوم الأحد تحت شعار" مسلم مسيحي ايد واحدة" للمطالبة بمحافظ مسلم مدني..
- طيب بما اننا ايد واحدة.. ينفع نطالب بمحافظ مسيحي مدني؟
- لأ ولو مسكتش هنطلع ديــ... أُ.... فاهم؟؟
• حرية التعبير لا تعني عدم تجريم التصريحات العنصرية او المظاهرات العنصرية، الدكتور عصام شرف، وهو راجل محترم ومتحضر " لازم يخرج من ثوب "الراجل الطيب" ده.. الوطن محتاج بسط سيادة القانون علي الكل بلا تمييز، محتاج إظهار قوة الدولة وليس ضعفها.. اللي بتعملوه ده بيبعت الرسالة الخطأ في الوقت الخطأ والمحصلة مزيد من الفوضي
• اللي بيحصل في قنا رسالة كاشفة لمن يهمه الأمر، الموضوع مش حكاية محافظ مسيحي، الموضوع حكاية مرض خبيت تم زرعة في مصر وهو "عدم قبول الأخر" المظاهرات العنصرية في قنا ابتدت من المدارس اللي بتعلم ان في اجابة واحده صح وطريقة واحدة لحل المسألة هي اللي صح، وابتدت من الإعلام اللي علمنا ان في حزب واحد هو الصح ورئيس واحد هو الصح، وابتدت من ثقافة دينية علمتنا ان في دين واحد هو الصح، لا مذهب وطايفة واحده هي الصح والباقي كفار والي جهنم وبئس القرار
• انا مش متخيل ان كريم رجب ومدحت طاهر سالي زهران واحمد بسيوني وكريم بنونة وميات غيرهم استشهدوا علشان الحرية والمساواة والعدالة الإجتماعية،،، وبعد اقل من 3 شهور، الشيخ ابو عفاف رئيس الجمعية الشرعية يقود مظاهرات في قنا ضد محافظ علشان ديانته.. ياخسارة ، ممكن يكون دمكم راح هدر؟
• لما ناس بتلبس أبيض في أبيض بس مهمتها نشر السواد، ولما ابو اشرف يسمي نفسه الشيخ الزغبي ويلبس خليجي ويقول من يبايعني علي الشهادة في سبيل الخلافة، ولما حسين صلاح بتاع المنزلة يبقي اليعقوبي ويلبس سعودي ويكلمنا عن غزوة الصناديق، يبقي لازم نشوف مين اللي باع مصر للسعودية من السبعينات لحد دلوقتي
• اوعي حد يفرح ولا يخرج ولا ياكل فسيخ يوم شم النسيم،،، حرررررررررررررام شرعا حسب الشيخ الزغبي زعيم حركة الهجوم علي الأديرة لتحرير الاسيرات اللي اللي..
- ليه يا عم الشيخ؟ ده شم النسيم هو العيد المصري الوحيد اللي بيجمع المصريين كلهم من ايام الفراعنه!!
- مش عارف ليه؟؟ بتقول عيد وبتقول مصري وبتقول يوحد ؟؟؟ يبقي اكيد حراااااااام يا كافر... وتحيا جمهورية مصر السعودية
• بعد نجاح ثورة قنا، متظاهرون أمام مستشفي بركة السبع تنادي بإقالة الدكتور جرجس عزيز مدير المستشفي، علشان حرام، ورفض مدرسي العلوم بمدرسة مصنع المكرونة بالعياط ترقية استاذ وجيه ابو الواد مينا اللي في ثالثة رابع علشان لا ولاية لكافر علي مسلم، وعودة رحلة مصر للطيران المتجهة الي قطر بعد اعتراض الراكب "العربي شاكوش" نجار مسلح بالدوحة لان الطيار نصراني
• دي بجددددددد بقا- اعتراضات في اسوان علي المركز الطبي الذي اقامه د. مجدي يعقوب لخدمة اهالي المحافظة، لشبهة ان يكون الأدوية بها منتجات الخنزير
• تعليق جميل كتبه مراد عبد الخالق تعليقا علي مقالة للكاتبة "فريدة الشوباشي" بعنوان "تحرير فتكفير" في المصري اليوم، قال تخيل عندك "زلعة مش" مقفولة بقالها 30 سنة وجيت فتحتها، طبيعي اللي هيخرج الأول الروايح اللي مش ولا بد والدود وغيره..وقال غداً سيكسر شعب مصر الزلعة بكل ما فيها وربما يجد بقاعها كنزاً مدفونا ادخره لنا الزمن... يا ريت يا مراد.. من بقك لباب السما
• كفاية فضايح - شيلوا محافظ قنا

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :