بقلم: بيشوي مكرم
حبيتك وبحبك وهحبك ده انتي مصر. مصر مش حد غيرك
من نيلك شربت ومن أرضك أكلت وعايش طول عمري في خيرك
من سحرك ألهمتني الشعر والكلام من ترابك وسماك وطيرك
سياسة إيه وحكومة مين اللي تكرهني فيكي وأنا ليا مين غيرك؟!
الحكومة هتروح وتمشي والسياسة وناسها نسيوا خيرك
بس أنت بجد أمي وحبي هايفضل ليكي ومش لغيرك
ولاد نسيوكي عمالين يدوسوا وينهبوا ويقتلوا ضيفك
وغيرهم بطالين كسالى ومرتشين شغالين لما و قفوا سيرك
وأحزاب ومجلس ومؤتمرات عمالين يجربوا لما هدوا حيلك
فقر و بطالة ومدمنين و شايلة يا أمي ومستحملة بجد كتر خيرك
فراعنة وحضارة وخير أنت عملتيهم عارف و شاكر جميلك
فى كرب و أوبئة وسيول وفتن واضطهادات بأقف وأصليلك
ولما تضيق والدنيا تصعب ويجى اليأس بالفرج والصلاح بادعيلك
وطنية وحب ليكي لا متلاقيش ده حتى انتمائهم راح لغيرك
ده بقى غير الإرهاب والظلم و كتير ما انتي عارفة هو أنا اللي هاحكيلك
وأنا تايه لا عارف أروح فين و أشكي لمين كل أما أتعب أجيلك و بهمومي أرميلك
وعلى ما هاقدر ها اتكلم واتكلم بس انتي قومي وشدي حيلك
مش جايز يجي يوم وولادك يرجعوا وكل واحد من اللي عنده يديلك
وتنتهي المشاكل والخلافات والحب يرجع ونشوف هلالك جواه صليبك
ولحد اليوم ده ما يجي ها شتغل أنا وهحاول يمكن أردلك شوية من خيرك

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :