قانون تنظيم معاكسة المزز- قانون حمامات المترو
بقلم: مايكل فارس
شبابنا، شباتنا، أولادنا، بناتنا، رجالتنا، ستاتنا، ذي ما إتفقنا خلاص أنا قرَّرت أكون الرئيس، وهخلي الشعب يهيص، وذي ما قلتلكم الحلقة اللي فاتت أنا ضد كلام إخوانا بتاع الدولة المدنية بمرجعية إسلامية، وهخليها دولة مصرية بهوية مصرية بكل ثقافتها وأديانها و"إللي عاجبه عاجبه وإللي مش عاجبة يشد في حواجبة"، وفكرت أعمل كام مشروع قانون مبدئيًا..

أولهم هعملكم مشاريع لولبية في كل حتة، أولها قانون "حمامات المترو"، في كل عربية حمامين واحد رجالي وتاني حريمي، وهلغي العربيات الخاصة بالستات هخليها كلها مشتركة، وعشان الشباب الغلبان إللي مش عارف يتجوز أنا هعمل "قانون تنظيم معاكسة المزز"! لكل شاب الحق إنه يعاكس خمس مزز يوميًا بشروط معينة، أولها لا يقل سن المزه عن (18) سنة، وتكون مزه مزه يعني؛ بالإضافة إنه ممنوع لمس المزه يكتفي بالاقتراب والتصوير فقط لاغير. وعن شروط المعاكسات..ألا تتم المعاكسة أكثر من ثلاث دقائق لإعطاء فرصة لباقي الشباب، وأن لا يتم استخدام ألفاظ نائية أو خارجة عن الآداب العامة، وفي حال تضرُّر المزه من المعاكسات نتيجة مخالفة الشروط المنصوص عليها بالقانون، هعمل شرطة خاصة تحت اسم "شرطة المزز" ليها الحق تعمل محضر وترفع دعوى قضائية لأي شاب خالف شروط المعاكسات..

وعن عقوبات القانون، هخلي القانون يمشي بمبدأ "كما تُدين تُدان"، يعني الشاب إللي عاكس غلط هخلي قسم الشرطة يعاكسه غلط برضه، وهيكون في اثنين غفر م اللي إيديهم ذي المرزبة دول اللي كانوا ييجوا في الأفلام الأبيض والأسود ينفذوا القانون ع الشاب المُعاكس... إللي عاكس مزه غلط وخالف الشروط هخلي الاثنين الغفر دول يعملوا فيه اللي عمله في المزه بالضبط.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :