الراسل: مينا سامي

آبائي،
زعلانين من السلبية... والانعزال
وأنا اللي اتولدت
أحلامي لونها أخضر
اتوأدت
في قبر تقاليدكم والخوف من الزلزال
وأنا إيه بقالي ومازال
باقي؟
بقيت ذي الــ .....
بدور في سواقي
إياك تنتقدوني لجهري
بالحق
***
إخواني،
بتعارضوا القهر
والقهر في الأصل قهري
بتلعنوا أخلاق طمأنة حرية
وبإيدكوا جف نهري
وظلمانا المدارية
تصفني أقلية
وعايش عليك عوالة
والأرض ليا
وجواهرها جواهري
قول.. ما هي مش بفلوس القوالة
كيف أبقى في بلدي ضيف؟
قولي أنت بقى من غير زعلة
أأمن لضهري
لواحد مثله الأعلى
الظواهري؟
على كل حال
الرأي رأيي
والقضية قضيتي
أوعدكم أشارككم
لما يبقى الفساد
رغبتي
وأسهل خطية
ولحينها– اللي مش هايبجي
هاروب قصتي
وهاروي هويتي
القبطية.. بدمي
وأغمرها بشمس الكرامة
وأزرعها في جنتي
وأقص عليها دراما
محنتي
يا زرعة القوة والكرامة
أخويا مش معايا في بلوتي
أخويا مش سامع شكوتي
يا زرعة القوة والكرامة
إمتى تنبتي؟؟
***
يدعوني لوحدة وطنية
وأنا هأعرفها
ذي ما ضميري شافها
وحدة وطا نيه
الأخ عايز صوتي في الصندوق
وبعدين يقولي اشرب دوق
يلبسني الزنار
ويركبني الحمار
بالمقلوب
ويضربني مع الرأفة.. بالنار
ونصلي في سرادق
ونسيب بيوتنا ونعيش في جحور
ونموت في خنادق تحت الأرض
دا بفرض
إنهم كسبوا
أو كذبوا
وإحنا صدقناهم
***
عايز صوتي في الصندوق
يطالعني بابتسامة
ذي العسل
ويقولي بطل كسل
ليه مش بتشارك معانا
إمبارح مشفتكش في الندوة
وراح عليك كان بيبسي وغدوة
لكن ملحوقة
ثم أنت مسيحي كبير
لازم تبقى قدوة
ومجيتك الندوة
تجيب المسيحيين بالعدوة
(وهذا هو الطريق إلى التغيير
وربي وربك رب العالمين)
طب على مين
ما إحنا فاهمين
ما إحنا المفروض فاهمين
***
عايز صوتي في الصندوق
ولما أقوله هات حقي يقولي
في عيد المشمش
أقوله مش مفيش للمشمش
عيد. يقولي طب في البرقوق
خيال ولا في الحلم
دلوقتي يظهرلي الحب
وكيف السيف في غمده نايم؟
له طريقه في الحرب
وطريقه في السلم
فحاسب
ذي مخرج فيلم
في دماغه كل شئ
بس شئ بشئ في الوقت المناسب
ودا علم
امتى يلدغ يجرح
امتى يلدغ يسم
دى ناس إن عدلت
عدلها ظلم
***
عايز صوتي في الصندوق
عايزنا ذي النعاج في السوق
مربوط من إيدي
من رجلي
من رقبتي مربوط
مخنوق
منه ومن أمثاله
مع إني مخلوق
على صورته ومثاله
ومفيش بنا فروق
***
يدعوني لوحدة وطنية
وأنا بقترح بما أن الميه
أساس الحياة
والإنسان نهايته تراب
نتجمع ونسميها وحده طينية
بس نشيلها فوق روسنا
وندفع الجزية بدمنا أو فلوسنا
اقتلي يا أرضي
جوايا طاووسي
جميل وكبير
بس منفوش مفهوش
دوري عليا يا أرضي
ودوسي
واسقيني من سمك
في كئوسي
وانشقي وابلعيني
واهضميني يا أرضي
قبل ما أشتري بفلوسي
كرامتي وصون عرضي
كل دا حصل في خيالي بس
يوم ما البوق
زعق.. رنم.. غنى.. عزف
قبل ما أفوق
وقالي بغزل
عايز صوتك في الصندوق
تمت

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :