بقلم: أشرف فايز
الثورة قامت؟
ولا محتاجين لثورة من جديد؟
الصوم خلص
بس لسه ما بانش لينا أي عيد
والفجر واقف من بعيد
وألف إيد
متمدة لأجل تخطفه
وتخوفه
ووشوش غريبة
لا عرفها يوم
ولا هيّ كانت تعرفه
صبحت صورتها في الميدان
وكل يوم الصورة تكبر عن زمان
واللي بدأ لينا الطريق
تاهت ملامحه
ولا حتى فاكرين انتهى
من قلب جرحه
بالدم زرع القمح ف الأرض الشراقي
وكان بيحلم بالأمل وقت التلاقي
القمح خًضَّر ف الغيطان
وآن الأوان
يا بلدنا خطوة ع الحصاد
بس اللي باقي
وجات خفافيش الظلام وكلتله قمحه
ولحد إمتى يا غيطان الصبر صبارك عنيد؟
ولحد إمتى يا بلدنا هاتفضلي ف عيشة العبيد؟
ولحد إمتي دمنا هايروح هدر؟
ولحد إمتى هانبقى لعبه للنصيب أو للقدر؟
ولحد إمتى هانبقى جوه أسوار الحديد؟
لسه هانحلم من جديد
لسه هنبدأ خطوة جات من عمر فات
يااااااه يا بلد
أمرَّ من سوط الكلام
سوط السكات
لكن يا بلدي لسه بأحلم بالأمل
فجرك بطل
قادر يشق الضلمة ويجيب النهار
يإيدين ولادك يصنعوا ألف انتصار
ولا عُمر يأس يشِلنا
ولا تاني خوف هايذلنا
طول ما الميدان موجود وحي في كل دار
هانقول عمار هانقول عمار..

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :