كتب : فادى يوسف
واحد اتنين هما الاقباط فين!!!؟؟؟ هما الاقباط فين هما الاقباط فين
اه الاقباط فى الثورة واقفين. يحموه اخوتهم المسلمين. ويصرخوه احميها يارب امين. من الاخوان والوهايين
واحد اتنين هما الاقباط فين
مهو الاقباط فى الدستور. يا يكون الاول يا يغور . ده شئ مش معقول خليكم بس فاكرين
واحد اتنين هما الاقباط فين
اهو الاقباط فى الاحزاب . كلهم رجالة وشباب. متسجلين علطول غياب .وفى الندوات والاجتماعات مهماش فاضين
واحد اتنين هما الاقباط فين
كمان الاقباط فى البرلمان . لا ليهم كرسى ولا مكان . بس كل واحد يصوت عشمان . ان المشاركة تخزى العين
واحد اتنين هما الاقباط فين
الاقباط فى انتخابات الرياسة . مش عارفين يفكروه حتى بحساسة .عاوزين ايه اما دى والله غلاسة . بلاش تحلموه وانتم نايمين
واحد اتنين هما الاقباط فين
يمكن الاقباط فى الكنايس . كل واحد فيهم عليها حارس . بيطلع منها راهبة وكارز. ونسيب البلد بقى للسلفيين
واحد اتنين هماالاقباط فين
ايه الاقباط قاعدين فى بيوتهم ! خايفين على ولادهم وبناتهم. خليهم كده يا خبيتهم وبلاش زن محناش ناقصين
واحد اتنين هما الاقباط فين
الاقباط بيهاجروه ومسافرين .على بلاد الفرنجة رايحين . طيب الغلابة هيروحه فين . الا صحيح هما الاقباط فين !!!؟؟؟
نقول كمان ولا الاحسن نشوف الاقباط فين
الاقباط فى الثورة والثورة مستمرة ومخلصتش ولسه فيها ثوار عاويزن الخير للبلد وميكونش هما الى عملوه الثورة ويجى غيرهم يسرقها واظن انتم عارفين انا اقصد مين
لكن مكنتش الثورة ميدان وعلم دى كانت روح ودم روح واحده مسلم ومسيحى ودم واحد نزل من كل رصاصة كانت ضد الثورة
الثورة ضد الحكم والحاكم بدات من الاقباط والى نسى يفتكر العمرانية والى نسى يفتكر الاسكندرية والى نسى يفتكر كل لحظة قولنا فيها لا لمبارك والدخلية
قدامكم يا اقباط ثورة جديدة او بمعنى اصح استمرار لتصحيح المسار شاركوه فيها عشان دى بلادكم وزى ما بدائتم كملو فيها عشان محدش يقول هما الاقباط فين !!!؟؟؟
ومن الثورة على الدستور لان الدستور لازم يكون اولا وقبل اى حاجة وبمنتهى البساطة لو الدستور اتعمل بعد البرلمان هيكون فى تدخل كبير للسادة النواب فى وضعه طيب وايه المشكلة ؟ المشكلة ان السادة المرشحين المستعدين حاليا لمجلس الشعب معظمهم من اصحاب التيارات والافكار المتشددة بالاضافة انه مينفعش وضع الدستور بعد البرلمان لكن تقول ايه بقى للي عاوزها بزرميطا يبقى الافضل نشارك ونقول صوتنا ان لازم يكون الدستور اولا ومنقعدش ساكتين عشان محدش يقول هما الاقباط فين !!!؟؟؟
ومن الدستور على الاحزاب مهو لازم كلنا يبقى لينا فكر سياسى واحد او قريب عشان تشتتنا مش لمصلحتنا كمصريين معتدلين وعلى كل قبطى ومصرى يشارك فى حزب مدنى ليبرالى او ديمقراطى فعال ويفهم يعنى ايه سياسة الكلمة الى عمرنا ما مارسناها او جربناها وللاسف اتفرض عليا ده مش بمزاجنا وكل ندوة او اجتماع او فعاليات حزبية مشاركتنا فيها تكون قوية عشان محدش يقول هما الاقباط فين !!!؟؟؟
ومن الاحزاب على البرلمان ودى نقطة تخلينا نهتم اكتر بمكانا فى البرلمان المصرى مش اى برلمان تانى لاننا مصراوية مش جالية اجنبية ولا نستنى كوتة ولا زغروطة بعد ما الكراسى تتوزع واحنا واقفين نتفرج مكانا فى كل حزب بنظام القوائم النسبية هيوجد للاقباط كراسى باصوات شعبية مش وهبه ولا هدية عشان محدش يقول هما الاقباط فين !!!؟؟؟
ومن البرلمان لانتخابات الرياسة حلم مش بعيد رغم ان البعض بيعتقد انه مستحيل لكن كان نفس الحلم عند الامريكان السود زى مارتن لوثر كينج واتحقق على يد باراك اوباما بعد 40 سنة بس والرياسة منصب وتكليف مش كرسى وسلطة محتكره على الغير يبقى نشارك ولو فى الاول بامل ضعيف فى الانتخابات الرياسية عشان محدش يقول هما الاقباط فين !!!؟؟؟
كل دى دائرة مقفولة مرتبطة ببعضها نقطة الارتكاز فيها دلوقتى هى الكنيسة نفسها لاننا حاطين كيانا جواها ومش راضين نطلع براها بس الكنيسة دى امنا بنصلى فيها وبنطلب ربنا اما حياتنا وحقوقنا واملنا دى فى بلدنا وبين اهلنا
ممكن بقى نطلع برده الدائرة دى ونطلب حقوقنا من المسؤلين مش من الاباء ومنفضلش متقوقعين جوه الاوموم ده وفاكريبن ان فى مارد كبير بره مستنى يا كلنا لانه وبمنتهى البساطة لو احنا مطلبناش بحقوقنا فى المواطنة مين الى هيطلب وهنا يطلع السوال المعتاد عشان كمان محدش يقول هما الاقباط فين !!!؟؟؟
والكنيسة زى محنا جواها هى جوه بيوتنا وبيتونا فيها بناتنا واولادنا وكل واحد فينا خايف يشارك او يدخل حد من بيته فى اى حاجة ليها فى السياسة وبنحب نسمع قوى قصيدة امى ملهاش فى السياسة ونشوف فى الشاشة ونقول كويس اننا فى بيوتنا قاعدين لا يا سادة ده سلبية بزيادة و خلاص شربنا عليها القهوة السادة وخدنا عزانا واحنا ساكتين نشارك بقى ومنخافش انا وابويا وامى واخويا واختى وكمان اربى ابنى وبنتى انهم يشاركوه فى السياسة عشان محدش فيهم لما يكبر يقول هما الاقباط كانوه فين !!!؟؟؟؟

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :