بقلم: أشرف فايز
مهما الليالي تطول
وقمرها عنها يروح
برضه الأمل موصول
طول مانا فيا الروح
ومهما آجي وأروح
اليأس مش مسموح
في بكره يلقاني
واخدك في أحضاني
ومعانا قمر سهران
وندق على البيبان
ما تصحى يا نعسان
دي الرؤية ف الميدان
ظهر هلالها وبان
واتلموا أهل الدار
صُغِيَرين وكبار
والجار في كتف الجار
مستنيين العيد
ويشوفوا أحلى نهار
حتى أنا ياللي بعيد
كان قلبي وسط النار
واقف مع الثوار
ينده بأعلى الصوت
على قد ماظلمتيني
والله بحبك موت
مانا كل لحظة تفوت
غايب عن أراضيكي
بحلم.. أراضيكي
وأرجعلك من تاني
وف نيلك الطاهر
أغسل فيه أحزاني
المخفي والظاهر
وحزني مالوش آخر
لكني باتظاهر
يا حزني ماتهّدي
دا حلمي على قدي
مدي الوصال مدي
يا جنتي هِلي
وريحي ف ضلي
أحكي عن الغربة
مواويل ولا تملي
يا حلمي يا مهدور
امتى تشوف النور؟
ويهل تاني نهار
ونلاقي أهل الدار
اللقمه تكفيهم
وبدال ما جوع ومرار
أو حزن يكفيهم
يا قلبي يا شارد
قلع الغروب فارد
والغربة كالمارد
تاخد ولا تديش
حلم الجعان العيش
وأنا كل حلمي أعيش
مدفي بأحضانك
وقلبي يبقى نسيم
ويهف في غيطانك
آ ياليل مالوش آخر
طب ليه بتتفاخر؟
إن ماليكش حبيب
مع إن ألف غريب
ونجمه براني
واخدين هنا مكاني
وأنا اللي ماعمريش
أنساك.. بتنساني
ومهما تزيدني جروح
ومهما تئن الروح
اليأس مش مسموح
راجع أكيد راجع
وعن حقي راح أدافع
مانا الوحيد دافع
مهرك يا غالية دم
وحِزن ما يتلم
لكن عقدت العزم
ولا عمري هاتراجع
راجع أكيد راجع

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :