بقلم :مهندس عزمي إبراهيم

لازم تعرف إن ولائي لوطــني حقيــقي
ولازم تعرف إن طريـق الحـق طريـقي
وإن طريقـك هـُوا طريـقي
وانت أخويا.. أخويا شقيقي
***
أمـِّــنا مصـر وأبونــا النيــل
وتاريخنـا في وطنــَّا طويـل
وكفاحنـــا من أجلـــه دليــل
ديـني أنا قبـطي، وطبعًا مصـري
ومصري وبس
ودينــك مسـلم... طبعــًا مصـري
ومصري وبس
لا بتحويـر ولا بتزويـر
ولا بالزق ولا بالعافية
بالجغرافيـة
عِـلـْـم حقيـقي
أنـا أفريــقي وانـت أفريــقي
وانت أخويـا.. أخويـا شقيقي
***

راح أحكيــلك مَثـــَــل إنسـاني
فريق بريطاني وفريق أسباني
هجروا بلادهم
عبـروا البحـر اكتشفوا أمريـكا
استوطنـوا فيـها وعَمـَّروا فيـها
وزَرَعـُوا وبَدَعـُوا
ورسموا وصنعوا
ملاييــن مصنـع... أو فابريـكا
بغـَضِّ الطـَرْف عن البوليتيـكا
هل أولادهــم بقـوا بريطــان؟؟
وهل أحفــادهم بقـوا أسبــان؟؟
طبــــعًا لأ!
***
فيها المَجـَـري وفيها الصيني
وفيها مكسيكي وفيها فلبيني
وفيها روس ويابــان وهنــود
ومسيحيين وعـــرب ويهــود
كل مواطـــن.. كل مواطـــن
كل مواطــن صـار أمريكي
وبس أمريكي
***

هل علشـان.. دينــك إسـلام، بقيـت عربي!؟
طب لو صيني أتحـَول مسلم، يبقى عربي!؟
ولو صهيـوني أتحـَول مسلم، يبقى عربي!؟
قـول الحـق!
طبـــــعًا لأ!
ولا عشـان.. بتحكي عربي، بقيـت عربي!؟
طـَب لو صيني اتعَلـِّم عربي، يبقى عربي!؟
ولو صهيـوني اتكلــَّم عربي، يبقى عربي!؟
قـول الحـق!
طبـــــعًا لأ!
والا عشـان غــَزُِونا العَرَب، بقيـت عربي!؟
طـَب ما احتلــُّونا يونـان ورومـان وبريطان
هل نقـدر
نقـول احنـا جريـك أو طليـان أو بريطـان!؟
قـول الحق!
طبــــعًا لأ!
***
أمـّـا الأديــان!!
بركـة ونعمـة وخيــر وإيمـان
للإنســـان
الأديــان.. نـــور لمواطـن... وللأوطـان
ليه نعملـها سـبب للفـُرقـة وبـاب للنحـس
أنـت مصري ومصري وبَس
وأنـا مصري ومصري وبَس
وكفاية المُغرض فتــنة ودَس
***
قـول كام دولـة في دُوَل العـالـَم
ناسـهم تحكي بلسـان واحـد
ومعظمهم على ديـن واحـد
بس وفــاء الفـــرد لوَطــَنـُه
يفخـَـر بيــه ويرفـع شـَـأنـُه
***
إحنا ازاي بالمستعمِر نقـدر نفخـَـر
دا احنا نبـقي بمصر بنكفـَـر
نبـقى بنشـْرِك نبـقى بنغـْـدُر
عصر الجهل عـَـدى وفـات
وأنـا وانـت عمرنـا اخـوات
تتبـع شيــخ.. واتبـع قسيـس
من غيـر فلســفة أو تدليــس
إحنـا أولاد ميـــنا ورمسيس
إن كان على دينـك، ما تسيبهـوش
وان كان ع الــرب، ما تهملهـوش
لكن وطنــك أفخـَـر بيـه
وطنك اللي بتاكل منه وعايش فيه
وطنـك بيتـك تخلص ليـه
ولا تشـرك فيـه
***
خلـّي ولاءنا لمصر، وبس
فـلا رومـان ولا هكسوس
ولا بـلاد أكلــــها السـوس
لا غـربيــة.. ولا عـربيــة
لا من آسـيا ولا بلاد تانيـة
هـِيَّ دي... روح الوطنيـة
مصـر أعظم من أعظمهم
مش تزويـر.. بل بجـدارة
ليها تاريخ رائع وحضارة
مصـر منـــارة
دايمـاً شـعلة للحريـة
مصر قـلعـة أفريقيـه
لقبـطي ومسـلم ومِلـَـل تانيـه
***
منذ البـدء لو تتصَـوَّر
لو حتــدَوَّر
مصـر مكانـها ما عُمـره اتغيـَّـر
في الجغرافيـا
تــاج أفـريقيـا
***
من أعماق روحي ومن قلبي
وحيــاة مصر
وحيــاة ربـِّي
أنـا باحــاول ألمــس عقلـــك
أنـا باحــاول أكســب قـلبـــك
أنـا أفريــقي وانــت افريــقي
وانـت أخويـا.. أخويـا شقيقي
ونفس طريقـك هـُوّا طريـقي

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :