بقلم :مهندس عزمي إبراهيم
رُحــْـت أستخـرج بطــــاقة
سألني: إسمك؟
قلـت عَبـْـدُه
قال: عَبـْـدُه إيـه؟
قلـت: عَبـْـدُه عَبـْد رَبــُّه
قالـّي: الإسم بالكامل يا عـََم عَبـْـدُه
قلت: عَبـْدُه عَبـْد رَبــُّه عَبـْد الإلــَه
قال: واسم أمـَّك؟
قلت: طبعاً إسمها الست أم عَبـْـدُه
وخالتي اسمها اخـت أم عَبـْـدُه
***
قالـّي: بلاش تريقة
وخد السؤال اللي بعـْـدُه
عنوانـك وتاريخ ميـلادك يا عـَـم عَبـْـدُه
قـُلتهمله وراح كتبـهم في السِّجـِل عَنـْـدُه
***
سألني: دينـَـك؟
قلـت: ديــني!؟
إيـه لازمتــه يكـون في البطـاقة!؟
حَنـْبـَـكة، والا عَيــاقة!؟
قال لي: لازم بالقانون أحط دينـك في البطـاقة
قلـت ديــني أمـر شخصي!
يخِصِّـني!
ليه الحكومة عايـزة ديـني؟
دِلـــِّـني!
والا اقـولـَّك، بلاش تقولـّي، انا حاقـولـَّك
***
الحكومة عايـزة تحشي في كل شـيء ديني ودينك
عشان تميـِّز في الحيـاة بيني وبينك
ديـني بيني وبين إلــَهي
لا دخل فيه للحكومة ولا الملاهي
أمـْـر مش عايـز مناقشة أو خنـاقة
أمر مش عايـز تحايــل
ولا تسجيل في البطـاقة
***
في البــلاد الحـُـرَّة اللي سبـقـونا... بجــدارة
فــَن وأدب وعلـوم وأخـلاق وسياسة واِدارة
نـَـوَّروا الكـون جميعه بالثقـافـة وبالحضارة
قادوا شـُعلات نـَوَّرت للكل، مش بس شمعة
من فـَلـَك لهندسة لطـِب لاختراعات بروعة
الأديان عنـدهم أمر شخصي
متروك للعبـادة
مش للسيــــادة
يا ريت تفهم العُـربان معنى التقـدم والقيـادة
بدل ما يلطعوا الدين في كل استمارة
في الشهــــــــــادات وأوراق الإدارة
وفي الدســتـور والبطـــاقة
وحتى في رُخـَص السواقة
علشان تميـِّز بالديانة بين مواطن ومواطن
والأمـر زي الشمس بايـن
***
كرهونا ف بعض وفرَّقـونا وخيـِّـبونا
وخيـِّبوا بلادنـا خلـُّوها نايمة مكعـوره
متجمـِدة ومتأخــَّـرَه
بقينا في صف الأمم واقفيـن ورا
نسينا حريــة وحضارة
وقعدنا في قعر المغارة
هجـرنا أسـواق الثقــافة
ومسكنا أهـداب الهيــافة
متزمّتـين، متعقـَّدين
وعمَّاليـن نمضُغ في ديـن
***
بقينا لو قولنا بنمشي.. بنمشي بس لـِـوَرَا!
وشعبنا لو قولنا عايـش.. عايـش بمُقـْدَره!
بقينا للأسـف عايشين في طـاقة!
وكل هَمـِّـنا الديـــن في البطـاقة!
***
بأقـول لك إيـه!
يا عـم يا بتـاع البطاقة
بلـَّغ العَسكـَر، بلـَّغ المُحضَر
بلـَّغ الصُحْبة والإخـوان والقاضي والسجـّان
والترجمان والبرلمان وحُرَّاس الديـوان
بلغ اللي صوتك يطـولـُه
بلغ اللي أنا عايز اقـولـُه
أنا مصري
أنا قبـــطي
بالبطـاقة، ومن غير بطـاقة
أنا ما بانكـِرش ديـني
وولائي للوطـن
راجـع لأخلاقي ولديـني
***
بلـَّغهم يشيلوا من البطاقة الديـن
وكل انسان حسابه مع ربـُّه في يـوم الديـن
احنا مش على بـاب الجنـَّة
ندَخـَّـل ميـن، ونمنــَع ميـن
كلنـا أبنــــــــاء وطـن
عمره من عمر الزمن
أقباط ومسلمين، ونــاس تانيــين
كلنــا مواطنـين.. متســــــاويـين
ودي بطـاقة لإثبـات الهوية
للمواطنـة فقَـط
من غير رموز، من غير نقط
يا " مصري" يا "مصرية "
يا مؤمنيـن يا عادليـن
قولوا آميـن
وشيلـوا منـها الديـن
ومن الرقم القومي شيلوا (1) وشيلوا (2)
بلاش مَكـــْـر وحــَــداقة
وبلاش تلاعـب بالبطاقة

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :