قانون "حماية المايوه والبكيني من الإخوان والسلفيين"
بقلم: مايكل فارس
شعبي العزيز، أنا أشترك في الجروب ده، علشان كده أخدت قرار أضع قانون واضح وصريح لحماية "المايوهات"، خاصةً بعد ما طلع علينا بعض الشيوخ بمطالب غريبة، منها إنشاء "الشاطئ الحلال" بالمايوه الشرعي.. وأنا مش فاهم يعني إيه الشاطئ الحلال؟ هو معنة كده البنت اللي لابسة مايوه شرعي بتدخله (ولاوني مش فاهم برضة يعني إيه مايوه شرعي.. بس يلا أهي دي تصريحاتهم وخلاص)، والبنت اللي مش لابسة المايوه الشرعي نعملها شاطئ مجاور اسمة "الشاطئ الحرام"؟؟ أما البنات اللي بتلبس بكيني هنعملها شاطئ جديد اسمة "الشاطئ الحرام ابن الحرام"..

وبكده هيكون عندنا على أي شاطئ أو بلاج ثلاث شواطئ؛ واحد "حلال" بالزي الشرعي للبنات والسيدات، وكذلك الرجال؛ لأن عورة الرجل تبدأ من عند ركبته، لذا وجب تغطية ركبته. والشاطئ الثاني "الشاطئ الحرام" ده بيدخله بقى البنات أم مايوهات عادية. والثالث "الشاطئ الحرام ابن الحرام"، ده بقي للبنات الدلع خالص مالص أم بكيني وألوانات كده من اللي يحبها قلبكم.

ومن ذلك المنطلق، حسيت بالخطر الواقع على المايوه والبكيني، خاصة وأن الأمور كلها هتشير إلى أن البرلمان القادم هيتحكم فيه إسلاميين (بقصد الإسلام السياسي طبعًا)، وهم قادموووووووون قادموووون. وأعتقد في الحالة دي، أدي دقني لو نجحت في أي انتخابات لا رئاسية ولا قهوجية حتى.. المهم حبيت أشرع القانون للدفاع عن المايوه والبكيني من اختراق الإخوان والسلفيين.

نص القانون: "الدخول الرسمي لأي فتاة في كل شواطئ وبحار وترع مصر سيكون بالمايوه والبكيني المتعارف عليه دوليًا، وفق الإتفاقيات التي صدَّقت عليها مصر.. ولا تمييز بين بنات مصر.. فالمايوه للجميع.. والله الموفق".

وفي النهاية، بنصح البنات تمشي بمقولة "إلبسي المايوه واتدلعي.. ولكلام المتخلفيين أوعي تسمعي"..

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :