بقلم: ميرفت عياد

نحن الان فى مولد سيدى المتعافى .. تلك هى الصورة التى ظهرنا بها و نحن نهدم الجدار المقام امام السفارة الاسرائيلية بصورة كوميدية مضحكة .. و الشباب اقعد يفرح ويهلل و يتنطط تقولش هدموا سور برلين ياخى

و حقيقة ان المنظر يبعث على الضحك .. لان شر البلية ما يضحك.. ايوه بليه لان أكيد دلوقت بقت فضيحتنا فى وسائل الاعلام الغربية .. اكتر من فضيحة السمكة فى طاسة القلية ..

لان اكيد صورة شبابنا الناهض .. و هو متشعلق على سور السفارة و كأنهم طلبة مزوغين حصتين من المدرسة و داخلين سيما النهضة اللى بتعرض 8 افلام فى بروجرام واحد .. و شوية شباب ثانين رابطين حبل فى جزء ثانى من السور .. و اول ما وقع فرحوا وهللوا و لا كأنهم هدموا خط بارليف ..

فى الحقيقة لازم نهنيهم لانهم الحاجة الوحيدة اللى هدموها كانت احترام العالم للثورة المصرية و للشباب المصرى بصراحة كتر خيرهم .. مش عارفين من غيرهم كنا عملنا ايه فعلا .. وقفوا اسرائيل عند حدها و فهموها ان مصر فيها رجالة يقدروا يهدوا الحيطة ويعتدوا على السفاره .. لا و مش بس كدا كمان دول ممكن كمان يمسكوا الورق و الملفات و يرموها فى الشارع ..

ماهو ده اللى بيسموه الخبراء الاستراتيجيين" سلاح الردع" هما ضربوا وقتولا عساكرنا .. واحنا كمان رمينا لهم ورقهم فى الشارع ياله .. هه .. و الاكتر من كدا ده احنا كمان ممكن نرمى عليهم ميه " وسخة" اه داحنا رجاله جامدين قوى

صحيح هم يضحك .. و هم يبكى .. الظاهر انهم فاكرينه ماتش مصر و الجزائر .. و بعدين ماوريتوناش الفتونة و الجدعنة دى ليه لما كلنا العلقة التمام فى السودان كانوا فين الاخوة الفتوات دول يعنى ما شفناش سنجة طلعت ولا مطوة قرن اتفتحت ولا قزازة مولوتوف اترمت .. يجى واحد يقولى ما تظلميهمش دول دعوا على الجزائريين بدموع عنيهم .. امال هم خسروا وخدوا اربعة فى الماتش اللى بعده ازاى ..

ما علينا .. كلمة اخيره اقولها للاخوة المتهورين .. حركات البلطجة و الفتونة دى تعملوها فى ماتش كورة فى دورى الدرجة الثالثة .. لان السياسة محتاجة عقل مش بلطجة .. واخد الحق حرفة زى ما بيقولوا مش عافية .. و بسببكم راح حقنا فى دم ولادنا و بدل ما كنا اصحاب حق بقينا جناة .. واذا كنتم عملتم ده بدافع الوطنية مش شئ اخر.. امانه عليكم سيبوا مصر فى حالها ربنا يكفينا شر الغشيم المتعافى

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :