تفاجأ البابا شنودة الثالث بابا الإسكندرية والكرازة المرقصية أثناء عظته الأسبوعية بفتاة تصرخ وسط قاعة الكنيسة وتحاول أن تصل إلى المنصه الأمامية لتسليمه خطابا هاما ولكن أمن الكاتدرائية حاول منعها من الوصول، فزادت من صرخاتها وهى تقول "يا سيدنا الحقنى يا سيدنا" وتدخلت بعض السيدات بالقاعة لمنع الفتاه .. وهنا تدخل البابا شنوده وطلب من الأمن تركها، قائلا "طالما عايزة تسلمنا جواب سبوها" فصفق الجميع لقداسته.

وعندها تسلم البابا الخطاب فقام بفتحه وقراءته بدقة ونظر للأنبا مرقص أسقف شبرا الخيمة وطلبه وعرض عليه الخطاب بشأن مشكلة أسرية للفتاة وطلب منه حلا قائلا "شوف الموضوع ده وابقى قولى عملت إيه".

وبعد ذلك نظر البابا للجمهور وقال للفتاة "شوفى يا بنتى اللى سلمتينا الجواب خطابك وصلنا وأقول للأمن اللى شدك وحاول منعك إنكم غلطانين أنكم تمنعوها والمفروض يكون رجال الأمن طيبين ويحاولوا يرضوا الجماهير وأقول للسيدات إنكن يجب أن تكن لطفاء"، ثم وجه البابا كلامه للفتاه قائلا "شوفى يا بنتى مشكلتك من شبرا الخيمة وأنا سلمته للأنبا مرقص علشان حلها".. فصفق الجميع بحرارة للبابا وهم يصرخون قائلين "ربنا يخليك ياسيدنا.."

وعاد بعدها قداسة البابا للعظة ثم قاطعه صوت رجل يصرخ "يا سيدنا عايز أبعت لك جواب فقام الأمن بتسليمه للبابا فأخذه وقال له "حاضر يا ابنى الجواب فى جيبي وهشوفه"، ثم ارتفع صوت آخر لسيدة لتسليم خطاب لقداسته وقام الأمن بأخذ الخطاب وتسليمه..

وأرسل شخص سؤالا للبابا يقول له "أنا أعيش فى السعودية فهل الاعتراف للكاهن عن طريق التليفون صحيح" فقال البابا "لو اعترفت عن طريق التليفون يبقى كده بتعترف لجهاز أمن الدولة مش للكاهن وممكن ياخدوا اعترافاتك دى وتؤاخذ عليك، أنت لو عايز تعترف ممكن تشوف بلد قريبة من السعودية يكون فيها كاهن وتعترف فيها.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها