تفسيركلمتي "فلول" والحزب المنحل"

بقلم: مايكل فارس
المثل بيقول (الباب اللي يجلك منة فلة سدة بالفنلة) ؛ و(الفِل مش بس بفلوسة الفِل بقوتة ونفوذة) وكمان (لو لم أكن فلاً ..لوددت أن اكون فلاً) و(لو شربت من فلتها هترجع لحد بيتها).
بالإضافة للأغنية الشعبية الشهيرة (وأنا عامل دماغ تمام.. مام مام مام مام.مام .طعلي منحل من قدام.. أم أم أم أم)
وكل قوي وطنية ودينية وسياسية واجتماعية واقتصادية وحلوزنية وفركوزية وفوزية وبدرية وأي حاجة نهايتها.... "يــــة"؛ بتتكلم على فلول الحزب الوطني... وحرمان كل فلة منهم من العمل السياسي، ولو فيه انتخابات بالقائمة الفردية كل فل منهم هيكتسح بدايرته ورفعوا شعار (عــــودة الــفلــول).
وكأن أساسًا أن الأعداء الأسطوريين دوله مش موجودين في مصرالآن، ولازالت معاملاتهم مع رجال الأعمال والدولة قائمة بقوة، ولاكأنهم بيتعاملوا زمان مع كل قوى وطنية جهة جهة تيار تيار.
وكل جهة أو تيار لازم يكون جواه راجل أو اثنين مثلًا من رجال الأعمال اللي بيتعاملوا أساسًا مع أصدقائهم من رجال الأعمال بتوع (الفلول المنحلة)!.
المهم أنا حابب أشرح للجمهور تفسير كلمة (الحزب المنحل)؛ منحل دي مذكر للمؤنث (منحلة) الكلمة من شقيين أولها (من) ثانيها حلة يعني (من حلة) يعني طالع لسة طازه مستوي من الحلة، (يعني اللي عايز ياكل ياكل) وفيه تفسير آخر جاء في قاموس أكسفورد الإمبابي بيؤكد أن الكملة لها شقين :
الأول (م) والثانية (نحلة) اللي كلنا عارفينها ولو حطيناها في عبارة واحنا عارفين أن العبارة في قلب الشكارة فنقول مثلا أن الراجل ده زي النحلة.. منحلة يا راجل... ودي إشارة إلى أن الفل من دول مش هيهمد؛ نحلة بتشتغل في خلية ليل نهار ياعبد الستار.
وهناك تفسير آخر في قاموس شارع الهرم بيقول إن (منحلة) كناية علي الفتاه اللي لموأخذه يعني فبيطلقوا عليها (بت منحلة) مع إن كلمة (بت أو بنت) غير دقيق بالمرة (والحدق يفهم لية بقى)!
وعن تفسير كلمة فلول: فهي كلمة جمع للمفرد (فِل) والفل هنا مذكر ومؤنثة (فلة) يعني لو لمؤاخذه كده واحدة حُرمة ولا ولية من ولايا الحزب (المنحل) وفلة دي مشتقة من عقب السجارة بيطلق عليها المصريون على آخر السجارة حيث ينتهي التبغ من السيجارة وممنوع شرب الفلة (الولية يعني).
هذا توضيح للشعب المصري العظيم لمعرفة تفسيرات مايطلقونه في الشارع المصري!

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :