بقلم: إيهاب شاكر

عندي اكتئاب خلاني اتأخر في الكتابة عشانة الكلام مايطلعش بانفعال ومجرد رد فعل، لكن كان كل اللي ماليني وبيتردد جوايا صرخة جامدة، قمت مفزوع وعمال أصرخ يسقط يسقط حسني مبارك، ده كان العقل الباطن في الحلم، بعد أحداث الاضطهاد الفظيعة والواضحة للعالم كله من الجيش ضد المسيحيين، وأحب أن أدعونا " مسيحيين" لأن هذا هو الاسم الأصح. بعدها لاقيت نفسي بهدوء وبدون انفعال بقول" يسقط يسقط المجلس العسكري" إيش فهمه في حكم البلاد أصلا، وعلى أي أساس بيحكمنا ، وزاد وغطى اللي حصل قدام ماسبيرو، المسيحيين يندهسوا قدام العالم كله بمدرعات الجيش، زي ما حصل للثوار بالظبط في التحرير بس كان من عربيات الأمن المركزي، وده اللي جابته ال سي ان ان، جابت لقطة من عربيات الأمن المركزي وهي بتدهس المتظاهرين في التحرير،

ولقطة وراها ومدرعات الجيش بتدهس المسيحيين أمام ماسبيرو" يالا طلعوا 5 فروقات بين الصورتين" ما فيش ولا فرق واحد، غير إن دي مدرعة أمن مركزي، ودي مدرعة جيش، عشان تعرفوا إن المجلس العسكري هو أصلا من فلول النظام، وبيتصرف زي ماكانت الداخلية بتتصرف أثناء الثورة، وضرب نار على المتظاهرين السلميين، ويقولك إن الجنود ماكانوش حاملين ذخيرة حية، أمال طلقات النار اللي لقوها جات منين، ويمكن كمان إن المدرعات إللي داست المتظاهرين كانت من وحي خيالنا المريض اللي مليان بفكر المؤامرة أو أشباح في أذهاننا، زي ما لقينا جراكن الجيش في أحداث المقطم. والتليفزيون المصري، يا عيني على التليفزيون المصري، ماختلفش كتير عن أيام التحرير، هو هو نفس السيناريو، فاكرين صورة الكوبري!! هو نفس المبدأ، قال إيه الحقوا الجيش من الأقباط، يا نهار أبيض، بقى الأقباط هايهزموا الجيش، إيه التخاريف دي والاستهزاء بالعقول، المصيبة إن فيه ناس صدقت الهبل ده، ونزلت عشان تدافع عن الجيش، تخيلوا الجيش محتاج اللي يدافع عنه، يا نهار اسود، أمال لو حصل حرب هنعمل إيه، هنستلف جيش من برة.

المشير طنطاوي من كام يوم في تصريح قال، احنا مش هنسيب السلطة غير لما البلد تستقر، أه قلتلي، تستقر، شكرا الرسالة وصلت. في وجهة نظري إن الشعب كله إنضحك عليه من المجلس العسكري في موضوع الاستفتاء، والمجلس استغل الإخوان والإسلاميين عشان يوصل للي عايزه ، وده اللي مخلي الإخوان قالبين ع المجلس اليومين دول، لأنهم حسوا أنهم انضحك عليهم، وغرغر بيهم في موضوع الاستفتاء.

أرجو من حضرة رئيس الوزراء عصام شرف أن يقدم استقالته في التحرير مش للمجلس العسكري، هو جه من التحرير " على حد قوله يعني" ويمشي من التحرير، واحنا الشعب يعني قبلنا استقالته، أما المجلس العسكري، فاعتقد بعد المهزلة اللي حصلت، فنحن الشعب نقيله، ولو تمسك بالحكم زي مبارك، نقول كما قلنا سابقا" يسقط يسقط .... المجلس العسكري"

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :