بقلم: مهندس عزمي إبراهيم

ممكن نعيش في بلدنا
وننسى الكابوس اللي خدنا
وبـَـثّ فيـــنا الخلاف
وسقانا سـم وزعاف
عشان نطاطي ونخاف
***
ممكن أعَـلــِّم ولادي
يبقوا في خدمة بلادي
ممكن أشـَغـَّل عيادتي
وافتح تجارتي وبضاعتي
وأأدي واجبي ف وظيفتي
***
ممكن أحس بأمان
في عِشـِّـتي أو في قصري
وارجع أحس اني مصري
سَـيـِّـد زماني وعصري؟
***
ممكن نخَضـَّر وادينــا
ونلــم نــوره ف عنيــنا
من كل عـِزبـة ومديـــنه
بالحب اللى راح من ايديـنا
***
ممكن بحيري وصعيدي
وبورسعيدي ورشيدي
يعيـِّدوا معايا عيدي
وأنا أعيـِّـد معـاهم
دايماً ايديهم في إيدي
***
ممكن لخضرة العفيفة
تهـدي الصباح للغيطان
وبنت بلـدي الشريفة
تمشي ف بلدنا ف أمان
ونقول نـُكـَتــنا الظريفة
ونبقى زي زمان
***
ممكن نراعي ضميرنا
ونحتـرم رأي غيـرنا
واعتقــاداته وديـــنه
زي اعتقــاداتنا وديـــنـّا
***
ممكن نكون مؤمنيـن
والمصري "مصري أميـن"
بأي ملــَّـة وديــن
ونسيـب إلهـــنا "يُديــن"
***
هل ممكن أفرح ببلـَدي
واربّي بنـتي ووَلـَدي
وأغني موالي فيها
واشرح غلاوتها عندي
***
ممكن أشم نسيمها
وأعيش في خيرها ورباها
زي الغريـب اللي جـاها
عايش في نورها وخيرها
وقلبه بيحب غيرها!؟
***
قولولي ممكن نعيـش؟
ونطـرد الخفــافيـش
وكل مأجور وخاين
وبلطجي ودرويـش؟
***
ممكن نعيش في بلدنا؟
زي بلدنــا مافيـش!

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :