بقلم: جرجس ثروت
طول عمرك يا بلادي أرض الجمال صحراء كنت أو وادي.. عروسة جميلة وعلى عريسها بالحب تنادي.. مهد الحضارة والسبعة آلاف سنة، وأول زراعة على النيل في الوادي.. طول عمرك جوك دواء للعليل، وطالب العلاج بينادي يا مصر يا أرض الخير، وصفاء سماكي والخير ملاكي.. من يومك ومن طهرك فيك الخسيس طمعان وجاكي من كل صوب ومكان محتل وغازي ونازي.. ياما صبرتي يا بلادي على شر الرعاع والملوك، وياما دفنتي منهم في رمالك الطاهرة بصلوات الرهبان وفي الوادي.. شعبك الحر الأفريقي الأسمر فرعوني طيب القلب وللسلام محب وطول عمره بينادي.. من أيام "آمون" وهو على الإله الواحد بيدور وكانت سمرته مع وشه الجميل اللي دايمًا مبتسم ومنوَّر.. وآمون كان زمان لقب التوحيد ولفظ الجلالة بإيمان، وكان كل جنس وشعب جنب المصري ولا يبان.. وأيام العفيف "يوسف" أكَّلنا الشعوب حوالينا وجه العبراني عشان يأخد الخير والقمح من عندنا.. وبركة مذخورة ليك يا بلادي في إنجيل طاهر وليك فيه علامة.
 

العلامة يا ست الحسن إنه ييجي على سحابة يفتقدك ويخلَّص شعبك الغلابة.. طول عمر شمسك دفا وحرك لطيف ولا يعرف الجفا وقمحك وقطنك طويل يستر الفقير.. لغاية ما جه ... وجعل من شعبنا ذليل وللعيش يقف طوابير.. والخطة يا أمي كانت محكمة ولغاية دلوقتي العدل الحقيقي الكامل ولا يعرف فيك طريق محكمة.. شد حيله الردي وعدو الخير وأصل الشر وكل عدو وبالخراب مبتدي.. أحكم الخطة وساق عليك جيوش والأندال عملوكي محطة.. ولا الجبان يعرف إن ممكن تخربشه القطة.. وأنت امرأة الأسد ملكة في عرينك حتى لو ابن امرأة الأسد نسي أنه قدام مين واقف.. جوك الساحر وبعدك عن الفيضان والطوفان والإعصار والبركان.. لولا (...) كنت يا بلادي هتبقى جنة الأرض ويملاكي ولادك رياحين.. لكن تعالي بقى نشوف مع بعض إحنا وأنت على فين رابحين.. لينا من الزمان عقود أسودها العام الماضي ونتمنى إنه لا يعود.. قامت فيك هوجة قالوا عليها ربيع.. أخدت معاها الجو الحلو وربيع وبقى خريف والرمة فينا بيبيع.
 

جوك يا بلادي الحر بقى برد بالمرة.. برد يلسع الزرع ويخلي اللي في الشارع يدخل من برا.. ولا عمرنا شفنا صقيع زي السنة دي.. لما شمسك نورها يتطفي وحرارتها تبرد والدفء يختفي.. يبقى أكيد من فوق فيه غضب وفيه ردي وسطينا عاوز يولعها وبيطلب من كل البلاد جاز وحطب.. عمر درجة حرارتك يا حرة ما بقت حد أدنى ووصلت لتمانية، لكن يمكن من فيرس صابك في المخ أيوا وعاوز خرابك.. خلى المخ مركز اتزانك يفقد السيطرة على الحرارة وميزانك وبكدا يبقى التوازن اختل والحق ضاع ومن الإصلاح الكل زهق ومل.. زرقة الموت ظهرت على جلدك وشفايفك لون الورد الأحمر البلدي كانت وأزرقت وراح لونها الشهي وراح السلام من دارك.. وقف النطع وابن قليل الحضارة والأصل كان حافي وطول عمره لحضارة الوادي يعادي ويجافي.. أصلك بتغيظيه بحسنك وجمال طبعك فيه فرق بين ثقافة الرمال وثقافة وجمال وخضرة ووجه حسن الوادي مع أنك صاحبة فضل وبخيرك ومنه كان يشحت ولغاية دلوقتي بفضلك فضل.
 

الحانوتي الزفر بريحة الميتين واقف على بابك مع بتوع خرابك وشايل كفنك بإيده النجسة.. وحدووووه بيقول وبصوت عال بينادي.. وأنا من هنا برد عليه وأقوله طول عمرنا موحدين يا مسكين شوف أنت بتكلم مين؟؟؟ "مصر" ستك وست اللي ندهلك.. لسه فيها النبض واسكت عشان صوتك قبيح سمعاه كأنه للتعابين فحيح.. وأنت من يومك كنت عندها خدام ولما شافت وساختك طردتك وشردتك الأيام.. استلقوك الميتين أهلك وناسك وقالوا بس اشتعل حانوتي وشيل للترب اللي ياما ذلك وداسك وحتى أخلاق أكرام الميت والكرامة من وشك راحت.. وصدقت نفسك إنك خلاص بقيت حر، ومع أن لكل مهنة شرف وفيها حر لكن أنت من عشرة الميتين صرت واحد منهم لا تنفع بس شاطر تضر.. اسكت وطي حسك يا واطى ستك الحرة عاوزة شربة مية تبل ريقها من مية حابي المليان سمرة الوادي.. جبت لجبت أرض القبط المية في قزازة نظيفة طاهرة على وصف الحكماء قالوا: هو دا دواها وهتقوم وتدفن بأيدها اللي سمها وجفاها.
 

أما التعبان ابن "سطانائيل" الشيطان ورمزه الحية والتنين صرخ في وش كبير الحكما وقال: فايزيين ومنصورين ولكل حكمائكم غالبين.. تروحوا فين أنتم في عددنا يا مساكين؟؟؟ دا إحنا من شرقها لغربها ومن شمالها لجنوبها ماسكين ومسيطرين سلموا نفسكم لينا وكفاية صراخ وأنين أنتم وهي هالكين هاكلين.. دا أنا رئيس هذا العالم وبقول للجاهل اللي ليا لا يعرف ولا بقوتي عالم.. أنا سخرت ليها رسل الخراب ومعاهم من نار سيوف وحراب هخليها كوم تراب وبلد خراب وبكل طريقة وأغيب منها الحق والصواب.. وأخلي أشرفكم يقف يشحت على كل باب وصرخ بصوت عالي وقال: كلاب كلاب !!! سمعت سته الحرة هبة النيل السمرا وطلعت له من جوا وهي بتتسند على اتنين من أشرف ولادها وشهم منور بالخير وقالت: على مين أنت بتنادي بصوت خسيس يصحي الميتين والهالكين أمثالك؟؟؟ شافها واقفة طلع يجري ومن وشها هرب، وقال: يا ويلي يا هلاكي أنت لسه ما متيش يا حرة وناوية على هلاكي.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :