أتهمت حركة شباب 6 إبريل الإعلامي "توفيق عكاشة" بالهزلية؛ وقالت الحركة أن "عكاشة أتهم المشير بالتزوير والكذب، وأتهم المستشار "فاروق سلطان" بالتزوير والتواطؤ.

 

وأضافت :"رغم هزلية عكاشة .. لكن بما انه بحكم القانون - شخصية عاقلة يحق لها فتح قناة فضائية و استئجار تردد والبث من داخل ارض مصر ... فهو يعتبر قانونا فى نظر القانون: شخصية عاقلة .

 

وتساءلت الحركة – في تعليق لها على تصريحات "عكاشة" - كالآتي:

* يا ترى موقف المجلس العسكري إيه ؟ هو مش كدة "توفيق عكاشة" بيعمل ( وقيعة ) بين الشعب و الجيش؟ و لا عادي نعديها و اصلها (حرية اعلام) بقى ! 

طب ماشي .. مفيش رد ؟ موقف قانوني بلاغ رد اعتبار ؟ تعقيب ؟ بيان ؟ طب نحنحة ؟ 

 

*و يا ترى موقف المشير إيه واحد زي ده .. بيتهمه اتهامات خطيرة زي كدة .. إيه مفيش تحرك قانوني ؟ طيب مفيش رد ؟ سبحان الله !

إيه الصمت ده؟ هو المشير ما فيش عندهم حد بيتابع القنوات فى الشئون المعنوية مثلاً و يرفع بيها تقرير ؟

 

* طب يا ترى إيه موقف القضاء العسكري المحترم تجاه هذه الاتهامات الصريحة ؟و لا هما فالحين بس يتشطروا على النائب "زياد العليمي" لما يقول تصريح مش مقصود .

 

* يا ترى إيه موقف ادمن صفحة المجلس العسكري؟ و لا هو فالح بس يرد على بوستات صفحتنا على كل كلمة ؟ .. بيتهم المشير حضرتك بانه مزور و كداب .. و تخيل بيفرق بين المجلس العسكري و الجيش .. تخيل ؟

 

* يا ترى ايه موقف لجنة الانتخابات الموقرين و المستشارين الموقرين ... على هذه الاهانات و الشتائم؟.. هل هيتسامحوا معها وهي تمس القضاء ؟

 

* و يا ترى إيه موقف القاضي الزند ؟ هو مش حضرتك كل شوية بتدافع عن شرف القضاء و معرفش إيه ... و مصدع دماغنا كل ما نتكلم على استقلاله ..

و لا سيادتك فى المواقف دي بتصاب بالصمم السياسي ... و كأنك لم تسمع شيئا ؟ و فالح بس حضرتك تتشطر على كل اعلامي او سياسي او نائب يناقش قانون يخص القضاء ؟ .. مستنيين رد 

 

ووجهت الحركة رسالة للمجلس العسكري؛ قالت خلاله :" يجب عليهم ان يتحركوا لرد اعتبارهم من تطاول شخصية سافلة مثل هذه.. آن الاوان لوضع حد بجدية لسفالاتها وهذيانها الذى طال صبرنا عليه، وإلا بقى .. يسمعونا سكاتهم بقى و ما يصدعوناش بعد كدة لما نتكلم نقد و لا معارضة موضوعية .. و على الله نسمع لهم حس أصلاً ... طالما سكتوا على هذيان زي ده و عدوه عادي !".