بقلم : مينا عطالله
قربيلي. حسي بيا وبي اللي فيا لما صبحي يبقي لِيلٍي
عم صبحي وعم عبده وعم نوح قاعدين يُعضوا
في لقمة نشفة من زمان. اي نعم مافيش سنان.
بس مضطرين علشان
لازم ياكلوا ولو حتي دوئة . لازم ياكلوا ولو حتي طقة
ايه يعني لقمة نشفة لاقوا اطري وقالوا لا ؟
عارفة مثلا عم نوح . من يوم ما اتولد مجروح
عٍشته موتَة وطافح الكوتة علشان اللحلوح
بس برضه عنده طموح
نفسه يعيش فوق فوق عل السطوح
اصله مقضيها نوم في الشارع ولكلابها دايما بيصارع
طبعا انتي مش حاسة بيه . عم نوح ده يعني ايه !
هو زيه زي غيره ارخص حتي من الجنيه
الجنيه اللي نالهوش قيمة . عملة وكلاها البريمة
طبعا ما انتي حاجةعظيمة
من ده اللي في جمالك انتي ؟ ده انتي في نظري احلي بهيمة
ولو اني ظلمت البهيمة
ياللي مشفتش منك رحمة . شفت منها هي لحمة
انا بصراحة عليكي مستغرب
عايش فيكي وفيكي متغرب
كل ما احاول اقرب منك الاقيني مش عارف اقرب
في ايه ؟! في ايه ده منك وبتاعك
انا طول عمري تباعك
ليه بتحني للي باعك؟!
عايز اكبر فيكي وانتي عايزة تفضلي زي ما انتي
لا وعايزة تصغريني
ده انا بكره اللي يصغرك وبحارب اللي يسخرك
تيجي انتي وتسخريني
بتصغريني وتسخريني وانا اللي متنيل علي عيني
قاعد وبكتب فيكي شعر
بترخصيني وتخليني كمان ارخص من الصيني
والناس تقولي مالكش سعر
ده انا من صغري وفي مدرستي علموني اني ارفع علمك
ياما كتبت بقلمي بحبك . كتبتي ايه انتي بقلمك؟
اديني سبب واحد علي اللي بتعمليه فيا
ليه بتكوني مبسوطة لما بتشوفيني هفيا؟!
ليه اللي عايز يعيش تقوليله تدفع كام !
ليه لما يقول ما عييش تقوليله تاخد اعدام !
ده حلال ده ولا حرام ؟
يالا مالوش فايدة الكلام
وحتي لو كلامي وصلك هو انا يعني ابقي مين!
انا حا يالا واحد غلبان او صايع من الصايعين
ايه يعني اعيش فرحان او حتي اعيش حزين
علي فكرة انتي محتلينك . يعني مافيش فرق بينك
وبين فلسطين
ولو حابة تكبري ولو عايزة تتغيري تقدري ايوة تقدري
مش هاتتعبي لما تدوري
دوري علي اللي زيي . اللي زيي كتير
وعلشان اسهل عليكي هتلاقينا في قاع البير
دوري راح هتلاقينا
اسمي ايه ؟ اسمي مينا
بس ياخوفي لما تلاقينا في ايدينا تحطلنا حديد
فكرانا اننا مش بنحبك . لا بنحبك وده مش جديد
احنا بنكره بس عمايلك لما نقابل ظلم شديد
انا خلاص اتهد حيلي
ياللي ربي خلقني فيكي مش مكفيكي عويلي
مستنيا ايه علشان تيجي عني وتشيلي
قربيلي
حسي بيا وبي اللي فيا لما صبحي يبقي ليلي

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :