من فضلك عزيزي القارئ ممكن اشحت توقيعك

بقلم جورج المصري

 

لدي رغبة شديدة في الحصول علي عدد 250 خطاب من اعضاء مجلس الشعب  يوافقوا علي ترشيحي في انتخابات الرئاسه القادمه . علما بأنني اتمتع بالجنسيه المصريه ابا عن جد مولود في مصر وتربيت في مصر ومقيم في احد حواري مصر الجنسيه الثانيه التي احملها جنسيه تثير المرح في نفوس فلاحين المنوفيه فانا متجنس بالجنسيه الصعيديه بالاصل و بالنسب و بالميلاد في عاصمه الصعيد . املك من السمعه الطيبه مالايملكه اي من المرشحين الحاليين اومن يعيد ترشيح نفسه مره اخري.

اعمل عمل حر كمستشار علمي للعديد من الشركات المصريه و الاجنبيه(مش جاسوس ومفيش منهم شركه امريكيه او اسرائيليه من اللي بتدفع للمعلم الكبير وابنه الصغير) لااتعامل مع اي جهه حكوميه غير اداره الجوزات و زمان من يجي اسبوعين بس مع مباحث امن الدوله فقط كنت ذبون مستديم للقهوه عندهم وبعد ان كفوا عني لم استطيع البعد عنهم لاني اصبحت مدمن القهوه التركي العظيمه التي كانوا يقدمونها لي في الساعات الاولي من الصباح عندما كان يصر هؤلاء الاحباء في استضافتي يوميا . وللحق لم المس بيد اي ظابط او امين شرطه او حتي عسكري نعم كنت اهان لفظيا ومعنويا  ولكن للحق لم يهان والدي او والدتي او اي من عائلتي سواء باللفظ او بالفعل . لم اعلق في السقوف او من الابواب ولم اكهرب في مناطق حساسه ولم اترك في زنزانه ارضها مبلله ببول وبراز من سبقوني لم اكن استعمل السلم للصعود للدور الخامس في لاظوغلي بل كنت اركب المصعد ولم يكن يكلفني المشوار لاسيجاره ولاحتي خمسه جنيه.

مثقف واجيد اللغه الصعيديه المصريه قراءه وكتابه وحاصل علي شهاده محو الشخصيه القبطيه وايضا حاصل علي شهادتين زور من جيراني في الارض وحاصل علي الاعداديه الازهريه علي يد آمام حتتنا الذي اصر علي وضع الميكروفون في بلاكونه بيتنا من كتر حبه فيا. وحاصل علي شهاده خلو طرف من العباسيه بعد ان شك الجيران في قواي العقليه بسبب  ارتفاع صوت سماعات الجامع اللي بتشتم فيا وفي اللي خلفوني بصوره دوريه.  وايضا حاصل علي شهاده بان لايحق لي التعيين في اي من الوزرات او الجامعات وهذه الشهاده حصلت عليها يوم مولدي وكتبوا في خانه الديانه مولود من اب قبطي وام قبطيه وكأن الشهاده اللي بتحمل اسم الجمهوريه متشفعش ليه.

وفاشل فشل ذريع اتخرجت من الجامعه بامتياز بس ياخساره ضاعت مرتبه الشرف  في العزال من سنه رابعه للحربيه وخدمت في الجيش وانضربت علي بطني لما استويت علشان ماكنش عندي ظهر اتسند عليه وياولاداه سمعت عن قصص ولاد الناس اللي قضوا الجيش في منازلهم بالبيجامه الصيفي و الطاقيه واخوكم الغلبان خدم خدمته وهو مؤهلات اقل من اي فلاح مخله دخل الجهاديه. تعالي ياجورج روح ياجورج صلحلي التلفزيون بتاع ابويا وصلح لي التليفون بتاع اختي وتعالي ياجورج ركب لنا لمبه وتعالي ياجورج ركب لنا ايريال وتعالي ياجورج ركب لنا الفيديو السته نظام ومعاه التلفزيون اللي جابه الحج من رحله المبرور و المغفور وسيبك من تصليح الردار الروسي الذفت وسيبك من العهده حضره الصول خضره حيتصرف ايوه حاصول كان اسمه خضره . ويابوي لفيت ياعالم علي بيوت سعاده البيه قائد المعسكر وبيت سياده اللواء وياريت كنت باخد اجازه اشوف فيها اهلي كانت اجازتي عامل ذي دكتور التلفزيونات اصلحهم ببلاش وادفع من جيبي حق قطع الغيار وكله ده في سبيل خدمتك يامصر فهل ياتري ممكن الاقي 250 يرشحوني ؟ طب لو الـ 250 برميل طرشي ملهمش مزاج كل واحد منهم يساوي كام مصري غلبان ذي حلاتي ؟ ياتري لازم اجيب توقيعات 2500 مصري ولا 25000 ولا 250000 ولا 2 مليون ونصف مصري وهل ياتري يجوز يكونوا اقباط ولا العدد ينضرب في 2 ماهو القبطي في مصر  عامل ذي المرأه الاسلام و في نظر الحكومه كل اثنين براجل ويمكن اقل ؟ فياعزيزي القارئ هل اطمع في ان اشحت صوتكم ينوبكم ثواب ؟