عجبـي

ميرفت عياد | 2010-01-22 00:00:00

بقلم: ميرفت عياد
من زمان الحرب بتدق طبولها.. من أيام الفرسان فوق خيولها والإنسان ما شبع من دم أخوه اللي غمر الأرض بعرضها وطولها.. عجبي!
ابكي معايا يا سمك النيل.. التلوث خللى جسمنا عليل.. وحتى شربة المية بعدها.. محتاجين لكلوينا غسيل.. عجبي!

الشجر بيبكي على الجبين نداه.. بيصرخ يمكن حد يسمع صداه.. بيرفض يتنفس هوا فاسد.. من ظلم الإنسان للحياة.. عجبي!
يا بسمه حلوة على الشفايف.. ليه قلبي من الدنيا خايف.. هو الخوف فيه طبع.. وللا علشان لمآسي الدنيا شايف.. عجبـي!

الموت بيخبط على كل باب.. وبياخد من بين ايدينا الأحباب.. مالك يا موت قلب يحن علينا.. لكن إيه يفيد معاك العتاب.. عجبي!