خلص الكلام

أميل سمير | 2010-01-28 00:00:00

بقلم: إميل سمير
خلص الكلام.. خلص الكلام منكم.. وبزود أنا كلمتين.. ياعيني على أم بتبكي من القلب بدموع العين..
بعلو صوتها تقول عارفة ولدى راح فين.. وصل عند الغالي إللي مافيش منه اتنين..
خلص كلام البشر.. وبقول تلت كلمات: حرقة دم في قلوبنا، ومش هنقضيها سكات..
ومش هيقف الاستشهاد عند كل إللي مات.. كل يوم شهيد وتعبنا من كتر الضربات..
خلص كلام البشر في نجع حمادى.. من زمان في مصر وكل يوم بنادى..
تعبنا من كتر الظلم والكل سامع اهاتى.. بقول لكل البشر مالناش غير ربنا الفادى..
خلص كلام البشر علي اللي مالوش كبير.. سبنا الظالم في ظلمه بقي ظلمه علينا خطير..
نبحة صوت وحرقة دم من كتر الظلم في مصر كتير.. رسالة منا بنقول انه موضوع وعاوز تفكير..
يا حكومة بنادى وعامله مش سمعانا.. والحل في اديكى وقلوبنا وجعانا..
ادى الحق لأهله دى الناس تعبانا.. سمعانى وقافله ودانك قال يعنى مش دريانه..

المقال الموضوع يعبر فقط عن رأي صاحبه وليس بالضرورة عن رأي أو اتجاه الموقع